Kuando mos fuimos al tur del Leshano Oriente vijitimos 3 paizes. Tayland, Malezya i Singapur. En estos paizes vimos en Tayland Bangkok, en Malezya Kuala Lumpur i en Singapur la kapitala, ke se yama Singapur. Kuando estavamos en Bangkok kaminimos i vijitimos buen karar de lugares. Sin alargar muncho vos kontare. Empesimos del Palasyo ke se yama Grand Palace. Muy enteresante un Palasyo. La guerta, las fraguas, la arkitektura es koza de ver. Muy diferente una kultura. De aya pasimos al templo What Pho. Aryento ay fraguas diferentes i en kada un templo ay Budhas diferentes. El Budha de diyamante, la Budha echandose, la Budha asentada ets. Despues de aki mos fuimos al tur del rio Chao Phraya. En kaminando en el rio kon Barka, la vista panoramika estava una lokura. Kuando el sol estava ensima del templo Wat Arun di ke estava kemando komo fuego. A la noche mos fuimos uno de los bazares de noche. Mozotros mos fuimos a Pat Pong. Al otro diya de la demanyana mos fuimos al Floating Market, ke es un bazar en medyo del rio ande se vende todo modo de materyales aryento de las barkas komo ropas, zarzavates i frutas. De aya vinimos a Rose Garden. Muy grande una guerta ande ay parkes i fraguas diferentes. En las kayes se topa komo Taksi Motorikos ke se yaman TUK TUK. A la noche mos fuimos a un restorante muy enteresante. Sea Food Market. Solo por este lugar vos puedo ekrivir un otro artikolo. Si keresh vineremos al sujeto de oy, la supa ke komimos: Tom Yum Goong. Si keresh se puede azer kon gayna i kaldo de gayna o si keresh se puede azer kon la kaldo de zarzavates.
Materyales
4 Pedasos de gayna kortados juliyen o si keresh i si komesh
4 Karides Jumbo
250 Gr de Noodles
6 Shampinyones de kastanya kortados delgados
2 Kucharas de jenjivre kortadas delgados
4 Sevoyas freskas kortadas delgadas
2 Diyentes de ajo
2 Pimyentones Meksikanos sin las pipitas, kortadas delgadas
1 Punyado de brotes de soya
1 Karota
4 Ojas de Kol Blanka
4 Kucharas de azete
5 Kucharas de Sos de Soya
3 Kucharas de Vinagre
2 Kucharas de almidon (se avre kon 3 kucharas de agua)
1.200ml Kaldo de Gaina o kaldo de Zarzavat.
Aparejar
En primero se kortan las sevoyas freskas, el jenjivre, el pimyenton Meksikana, la safanorya i la kol blanka i el shampinyon, delgados delgados. I se sofriye aryento de un Wok.
De la otra parte se aparejan los Noodles komo makaron, despues ke se mete aryento de la agua yelada, se mete a los boles ande se va azer servis kon un poko de azete.
Aryento del Wok, se meten las Gaynas ke se kortaron julyen i se sofriyen i ensima se meten los zarzavates ke se izyeron sote. I ensima se vazya el kaldo de gayna o kaldo de zarzavat. Despues ke se buyo se mete aryento la almidon i ensima se vazya la sos de Soya, el Vinagre. Despues ke se karishtereya, se mete a las chanakas kon los Noodles. I se aze el servis a la meza.
