Un grupo de ranas kaminavan por el boske, kuando en supito dos ranas kayeron aryento de un pozo muy profondo.
Todas las otras ranas se agruparon al doredor del pozo. Kuando vieron ke el pozo estava muy profundo, gritaron a las ranas ke se aviyan kayido:
“Ijikos, no ay posibilita ke vash a salir bivos de aki… Vos vash a murir”.
“En vano no agash esfuerso”.
Las ranas ke se aviyan kayido no teniyan dingun dezeyo de entregar sus vidas tan fasilmente. Las dos ranas inyoraron los gritos i sinyales de sus amigos de ariva i ampesaron a aprovar a saltar kon todas sus fuersas. Las ranas de afuera del pozo estavan kontinuando a gritar i azer djestos kon las manos ke no teniyan dinguna posibilita de salir de ayi.
Una de las ranas oyo los konsejos de las ranas, oyo todo lo ke le estavan diziendo las de ariva, sus fuersas se eskaparon, se izo teslim i muryo en el fondo del pozo.
La sigunda rana no se desho, kontinuo kon todas sus fuersas, aun ke las ranas le aziyan djestos i gritavan: “Ke esfuerso en vano. No tienes dinguna posibilita de salir de aya i bivir”.
“Deten tu esfuerso i no sufras en vano, simplemente muerete”.
Malgrado esto la rana kontinuo a saltar, mas i mas ampeso a saltar mas fuerte, i al final dyo un salto tan fuerte ke reusho a salir del pozo.
Kuando salyo, sus amigos ranas le demandaron: “Komo izites? El pozo era muy profundo”.
La rana les ekspliko kon senyas ke eya era sodra. No oyo i no entendyo lo ke le diziyan. A la kontra le aviya paresido ke los djestos de las ranas de ariva la estavan enkorejando.
I ansina fue ke se enfortesyo i salyo afuera.
Moral:
1- Muestra lingua tiene el poder de azer bivir i el poder de matar.
2- Las palavras destruktivas si se dirijan a personas deprimidas, no lo alevantan, a la kontra los depriman mas muncho.
