Kuando tanye una muzika, mos vyene al tino pasar tyempo, kantikas, u byen notas, ritmos. Portanto la muzika no es solo esto. La muzika es una armoniya ke da a la persona una ermoza aktividad. Por esto dizen ke“la muzika es el mantenimyento de la alma”.
Por egzempyo un diya ke estamos un poko inyervozos, tristes u dezesperados sintir una muzika ermoza mos kalma.
Efektivamente para munchas hazinuras de inyervos es melizina. Munchos doktores, antes de entrar a una operasyon meten una muzika klasika para ke el hazino se kalme. Una kantika konta las ansyas, la alegriya, el amor i otra los penseryos, los sintimyentos.
Yo me echo i me alevanto kon muzika. Tanto me plaze, ay kaji dyez anyos ke me vo a los kursos de muzika Turka.
La muzika Turka tyene una kultura muy onda. Veramente ke no ay fin. Kon sus kompozitores, kon los tanyedores i sus instrumentos, es un arte muy profondo. Sovretodo las kantikas vyejas, tyenen unas sinyifikasyones fantastikas. Kompozadas por amores grandes, desepyones, alegriyas i ansyas.
El 13 de este mez, tuve la shans de asistir a un viyaje muy enteresante.
El kurso ande partisipo, BEYOĞLU KLASİK TSM DERNEĞİ, organizo una turne a RİZE- ARTVİN sivdades ande no pensava nunka de irme. Sinkuenta i sinko almas fuimos aresividos por el Prezidente de la Munisipalidad de Artvin.
ARTVİN, rejyon del mar negro, una sivdad anturada de vedruras, rozas i yervas de kolores a kolores, un aver limpyo i puro. Las komidas muy savrozas, por siguro todo organik.
El primer diya mos fuimos kon el avion de demanyana 7.30 para ganar el dia. De sorte ke salimos de kaza a medya noche. Arivimos a Rize, kaminimos diya entero. A la noche apenas durmimos tres u kuatro oras, salimos a kamino, kaminimos unos lugares una maraviya del mundo i oras de tadre arivimos al salon de konser. Sin eskansar mos metimos al rango, prova kon los tanyedores, vistir i atakanar, ya estamos en la shena.
Un grande remersimyento al prezidente de la Munisipalidad de Artvin ke mos kamino kon eskortes.
Un grande remersimyento al direktor, profesör de muzika Turka i kantador de la radyo Estanbol, İBRAHİM SUAT ERBAY.
Un grande remersimyento a la organizatris de la asosyasyon, AYLİN UZUN ke organizo este viaje.
A la torna en el avion meldando la gazeta del dia, vemos este anunsyo:
LAS MELODIAS DE LA MUZIKA TURKA REZONARON EN ARTVİN
La asosiasion de muzika klasika Turka Beyoğlu, dyo un konsierto maraviyozo en Artvin; los oyentes pasaron una nochada inolvidavle. El repertuar fue organizado por İbrahim Suat Erbay, uno de los artistos de la radyo i televizyon Turka. El konsierto se realizo en la universita Çoruh en el salon de Kongresos i plazyo muncho. El repertuar fue eskojido de kantikas klasikas Turkas i mezmo de la rejyon de Artvin.
El koro, i los enstrumantistos estavan byen kompativles. Kon la seleksyon de Erbay, el publiko akonpanyo las kantikas i bivyeron momentos emotivos.
Beyoğlu Klasik Türk Musikisi Derneği, provo una vez mas, el anyo pasado en Uşak i este anyo en Artvin. A la fin del konsierto, el konduktor i el koro resivyeron palmas mas de dyes puntos.
Ke orgulyo.
