Kiril, un ijiko en Kazakistan, paso los primeros 4 anyos de su vida en un orfelinato.
Todos los ke lavoravan en este orfelinato aviyan pedrido esperansa ke algun diya Kiril va ser adoptado. Porke kuando Kiril nasyo, nasyo sin su mano derecha. Dingunos keriya adoptar una kriyatura debilitada. Justamente por esta razon, sus paryentes lo abandonaron despues de 20 diyas de su nasimyento.
No abastava ke para Kiril era muy difisil de pensar ke puediya bivir toda su vida en un orfelinato, teniya tanbien una amargura de saver ke sus propriyos paryentes lo abandonaron, no lo kijeron. El ya aviya akseptado su disabilidad i nada puediya trokar esto.
4 anyos sufriyo en el orfelinato de no tener su padre i su madre a su lado i mas muncho sufriyo de ver ke sus amigitos i amigitas fueron adoptados, i el fue deshado aya. Kiril pensava ke el nunka sera adoptado.
Un diya, troko todo en supito. Un kuple de Kanada, Doug i Lesley Facey, vino a este orfelinato para adoptar una kriyaturika. Todos los dos se aserkaron de Kiril, ke los estava mirando kon ojikos tristes. Todos los dos estavan siguros ke Kiril era la kriyaturika ke keriyan adoptar, malgrado su disabilidad o por kavza de su disabilidad.
Alora, todos los dos demandaron a el direktor del orfelinato ke keriyan adoptar Kiril. El direktor fue muy kontente de esta desizyon del kuple i les demando si estavan siguros de kerer adoptar Kiril. Ma el kuple estava siguro de kererlo i konvinsyeron el direktor. Eyos ya saviyan ke izieron la eleksyon djusta.
Kuando Kiril abasho del avion kon sus paryentes, su mueva famiya, se konosyo kon su abuelo Dave. (Su granpapa). Tuvo una grande surpreza. Su abuelo tanbien aviya nasido sin una mano. Dave se aboko, i sin dizir un biervo, le amostro su braso.
Era un momento majiko. Kiril aviya topado una persona djusto komo el. Todos estavan muy emosyonados. Kuando vido esto, Kiril tuvo muncha konfiyensa i estava siguro ke esta era la famiya perfekta para el.
Kiril tuvo una vida muy oroza. Perfeksyono su inglez. Kada diya tuvo amigitos muevos ke lo kijeron muncho bien i le dieron todo el apoyo ke nesesitava.
Doug disho: Mi padre le amostro ke Kiril puediya azer todo lo ke kere en la vida. El es un grande merkador i partisipa a los Paralympics.
Mientres, Kiril se estava alegrando muncho kuando se saludavan kon su abuelo, “puso kontra puso”.
Esta istorya verdadera mos amostra ke no kale ke djuzgemos a los otros por sus aparensyas. Mizmo los ke son disabilidados mos pueden dar kerensya i alegriya i mos ambezan la kompasyon de krear una vida mijor.
Agora kreyo ke ya vino enverano. Las eskolas ya se estan serrando. Ke tengamos enveranada alegre, sanos i rezyos.
