Mos fuimos a Espanya munchas vezes. En primero empesimos kon Barcelona despues a Madrid i Toledo, en fin izimos el tur de Andalusiya. Sevilla, Cordova i Granada. Kada sivdad teniya diferentes ermozuras. Barcelona, di ke parese la sivdad es de Arkitektura Gaudi. De ande vos empesare a kontar? La Katedral de La Sagrada Familia, la kaza Battlo ke se yama la pedreria i la kaza Mila. La guerta de Park Guell. Kada uno es una ovra maestra. Mas de los ovras de Gaudi puedesh kaminar el monte de Montjuic, el Bario Gothiko, el sentro de Barcelonetta, la Marina, el monumento de Kristoforo Kolombo, el Pueblo Espanyol ke se topa aryento de una muraya, el Monte de Tibidabo, las dos plasas grandes ke son Plasa Katalunya i Plasa de Espanya, Plasa Real. La kaye ke se konose por el mundo entero es Las Ramblas. Aki puedesh topar kafes, restorantes, botikas de regalos. En las kayes ay artistos ke azen bayles i teatros de Mim. Mas de esto en esta kaye ay el merkado ke se yama La Boqueria. Aki es un bazar avyerto ande se topa botikas de Fruteros, Kasapes, kozas de Sarsicheriya, muy riko i enteresante un merkado. De las botikas puedesh merkar Tapas i al lado un vazo de vino o bira i delantre da las botikas en piyes puedesh gostar i komer. Un diya en kaminando mos fuimos a la Katedral de La Sagrada Familia. En salyendo teniyamos ambre i mos asentimos enfrente de la Katedral kon la vista maraviyoza i komimos aya. Estava muy kayente un diya i kijimos unas kozas para arefreskarmos. El garson mos disho ke kale ke bevamos la supa Gazpacho. En este aver kayente supa vamos a bever dishimos? Mos disho es una supa yelada. Vos va vinir bueno, vos vash a ferahlaneyarvoz. Al konsejo ke mos dates no vamos a dizir no, traymos veremos dishimos. Despues de bever la supa mos plazyo muncho i le dishe al garson estava maraviyoza la supa, me puedes dar la resefta? Deke no me disho i me la dyo. Me disho es una supa vejetaryana porke dingun materyal de animales no se mete aryento. Despues ke vash a eskapar la supa, puedesh komer un spesyal de los Espanyoles, la Paella, al lado kon un vino blanko yelado.
Materyales
4 Tomates grandes
2 Pipinos
2 Diyentes de Ajo
2 Pimyentones
2 Pipirushkas
1 Sevoya ke no seya muy grande
4 Kucharas de azete
1 Kuchara de vinagre
Sal
Pimyenta preta
Una revanada de pan sin la krosta
Aparejar
Todos los materyales se meten aryento de un robot de mupak.
Despues ke lo travatesh del Robot pasaldo por el tropito.
Ensima de esto se mete la azete, las espesias i el vinagre i se aze el servisyo yelado.
