Kuando era chika, los lugares ke mos ivamos para pasar muestras vakansas, eran oteles modestos. El konsepto de bufe libre dainda no se aviya enventado. La variedad de komidas era limitada. No mos importava kuantos sortes de komidas aviya. Munchas vezes komiyamos una dondurma ensima de la komida.
Vakansas no sinyifikava komer i bever, ni "ziyankarlik". Vakansas sinyifikava una mar limpya komo el kristal, los bodres de mar virjines, arena fina i muncha amistad i konversasion. Vakansas sinyifikava rizas, repozarse i deskansarse. Akeyos diyas, mos yevavamos pokos vestidos, un par de charukas de plaj, i un par de kalsados. No mos viniya al tino de merkarmos antojos, ni azete de mar. Si mos kemavamos muncho del sol, mos metiyamos yogurt ensima las kemaduras.
Mos suviyamos al Opel de mi padre i mos metiyamos al kamino. No aviya ayre kondisyonado dainda. Avriyamos las ventanas. Mos refreskavamos kon el ayre ke entrava de las ventanas. No diziyamos ke el kamino esta muy largo. Mos divertiyamos kantando kantikas finke yegavamos al otel.
Mi madre aparejava sandwiches de guevo kada vez ke saliyamos al kamino. Mos ambreyavamos porke el kamino era largo. Las sentures de seguridad dainda no se aviyan enventado. Kuando yegavamos al otel, mos enstalavamos en muestras kamaretas. Duspues mos vistiyamos los mayos i mos ivamos al bodre de mar. Muestro mas grande plazer era de saltar a la mar. Mos tapavamos la nariz kon la mano i saltavamos sien vezes del trampolin, asta ke kedavamos muertos de la kanserya. Agora era tiempo de djugar kon la arena. Nunka me plaziya ensuzyarme las manos kon la arena. Kon la arena seka, no se ensuzyan las manos, ma para azer un palasyo u un ponte kon la arena kaliya mojar la arena.
Esto era muestro divertimiento. No aviya tabletas, ni smartphones, ni videodjugos. Topavamos munchas kozas para mantenermos okupados diya entero, i kon plazer. Teniyamos unas kuantas kasetes, sintiyamos las mezmas kantikas unas kuantas vezes i baylavamos. Me esto akodrando de una kantika optimista: "Si el mundo se va kreyer en esto, la vida se va azer una fiesta, la djente se van a tomar de la mano, van a estar unidos"...
Siempre yevavamos kartas ande mos ivamos. Despues de komer mos asentavamos a djugar. Kon las kartas indivinavamos la fortuna. Aziyamos torres de kartas, esto era muestro pasatiempo. No teniyamos ambisyones. No esperavamos un otel mas luksuozo, kon pisinas, kon shezlonges mas komodas, un otel kon mas munchas estreyas. «Tomavamos plazer de estar endjuntos».
Eran vakansas ande las estreyas briyavan en el sielo, en lugar de la entrada del otel.
