Shavuot en la lingua ebrea sinyifika semanas. Despues de la sigunda noche de Pesah, el sinkuenten dia es la fyesta de Shavuot.
Shavuot se selebra este anyo el 02-03 del mez de Sivan. Esta data es la rekolta de los produktos muevos de esta sezon. I este modo el puevlo de Israel yevava la primera rekolta al Bet-Amikdash.
En este dia santo se dyo los dyez komandamyentos en el monte de Sinay, i esto es una djura del puevlo djudyo ke van a konformarsen a estas reglas.
Shavuot es una fyesta muy grande. A la salida del Egypto, el Dyo Baruhu mos salvo del esklavaje. Ma dainda no eramos un puevlo kompleto.
El buto de la Tora ke fue dada en el monte de Sinay, era de formar un puevlo ke tyene sus leyes i sus derechos.
Las ijikas vistidas de novya en las sinagogas sembolizan el kazamyento de los djudyos kon la Tora ke fue dada en Shavuot. Kerer byen la Tora es, la proklamasyon de la pasyon. Kuando mos aserkamos de la Tora, deshamos todo modo de sentimyentos i penseryos de detras, i mos konsakramos a la Tora.
En Shavuot no ay mitzvot spesifikos del dia, ma algunas uzansas komunes son, dekorar las sinagogas kon plantas i flores, no durmir noche entera estudyando la Tora, i komer kumidas i dulsuryas ke se azen kon leche. La leche mantyene la persona, es el alimento prensipal del puerpo de la persona, i la Tora es el alimento moral, espiritual de muestra alma. Shavuot es uno de los dias mas sakros del anyo djudyo, i es tambyen una fyesta ke munchos de entre mozotros no la konosen.
De ke se trata Shavuot reelmente?
Es ironiko ke Shavuot es una fyesta tan poka konosida. Porke en realidad, Shavuot komemora el evento mas emportante en la istorya djudiya, la entregasyon de la Tora en el monte Sinay.
Kualos son las razones por el deskonosimyento de Shavuot?
Es porke esta fyesta no tyene simbolos: no ay Shofar, no ay Suka, no ay Hanukiya.
Shavuot es una de las tres fyestas de peregrinaje del djudaismo, kuando todo el puevlo se reunisa en Yerushalayim para selebrar i estudyar.
Mi madre, Zelda Natan z"l me kontava ke Shavuot en los anyos 1943-1947 se fyestava en la eskola “Ben-Shemen” en Israel kon muncha felisidad. Kada elevo sus sestos en los ombros kon los produktos muevos de la primavera, kantavan i baylavan en la guerta de la eskola ornada de rozas, frutas i los produktos muevos.
En Shavuot se aze orasyones spesyales para fyestar komo un festival. La primera fyesta de este festival es Pesah, la sigunda Shavuot i la tresera es Sukot.
Kada djudyo, seya ombre, mujer u kriyatura deve de asistir a las orasyones en esta fyesta emportante, para oyir los dyez komandamyentos de la Tora, porke esto es la baza de la ley djudiya.
En Shavuot se dekora las kazas, las sinagogas i mizmo las Sefer Toras. Este uzo semboliza, el lugar de los djudyos ke estavan asperando la Tora en el monte Sinay, estava yeno de vedruras, i de rozas golyendo al miskle.
Dyo kijo ke esta fyesta se selebre aryento de las ermozuras, kon alegriya i felisidad.
El Dyo ke mos ayege para kada anyo kon todos djustos en muestro entorno, sin hazinuras, kon pas i amor en el mundo entero.
