Oy vos kero kontar la supa ke bevi en Italya. Ya savesh ke me plaze viyajar a diferentes sivdades i konoser las kulturas diferentes. Fin agora me fui a Italia munchas vezes. Por egzempyo a Milano, a Veneziya, a Como i a Bari. La gastronomiya de Italya me plaze buen karar. Los Makarones ke se azen kon diferentes soses, las Pizzas, i el dulse ke vos konti mas antes, el Tiramisu. Por un turisto, Milano no es una sivdad muy enteresante. No ay munchos lugares turistikos para kaminar. Vos puedo dizir: La Katedral de Duomo es manyifiko. El pasaje ke se topa enfrente de la Katedral, Vittorio Emanuele II i el salon de la Opera ke se save por el mundo entero, La Scala. En Milano ay unos kuantos bulvares i kayes grandes i ermozos komo La Plasa de Duomo, la kaye Corso Buenos Aires, ets. Mas de esto ay unas kuantas guertas, galeriyas de artes i muzeos. La lingua ke avlan komo en kantando, la muzika Italyana i tambiyen la Gastronomiya. Un diya en kaminando en la plasa de Duomo, mos asentimos en un restoran aryento del pasaj kon unos amigos para komer unas kozas porke teniyamos ambre. Le demandi al garson ke supa ay i kualo mos rekomenda. Me disho el spesyal de Italya es la supa Minestrone. Kualo ay aryento, komo de supa es le demandi. Me disho ke es una supa de Zarzavat. Los amigos kijyeron gostar. Le dishe ke mos trayga. En bevyendo se ivan a komer i los dedos. Este karar de savrozo estava disheron. Le demandi al garson komo se aze esta supa i me konto. Es una supa me disho ke se apareja kon kaldo de karne i aryento diferentes zarzavates, i fideyos o sino kon noodles. Mos trusho una chanaka grande de supa para 3 personas. De en medyo tomaron a los chinis kada uno para bever. Me disho los zarzavates komo vos plaze puedesh trokar i puedesh meter diferentes materlyales.
Materyales
1 Sevoya grande
2 Dientes de ajo
4 Kucharas de azete
1 Kuchara de salsa de tomat
1 Kalavasa no muy grande
1 Karota no muy grande
1 Patata no muy grande
3 Ramos de apyo
4-5 deyos de fasulya freska
1 ramo de prasa
4 ramos de bazil
5 kupas de kaldo de gayna o de karne
1 punyado de makaron komo vos plaze o sino noodles
Sal
Pimyenta
Aparejar
En primero las zarzavates se sofriyen un poko
De otra parte aryento de una kaldera onda se friye la sevoya ke se korto chiko kon el ajo, aryento de esto se mete la salsa de tomat despues ke se izo sote, se mete las verduras ke se kortaron chikos. I ensima de esto todo se mete el kaldo de gayna o de karne. 15-20 minutos se kozen los materyales, despues se echa el makaron o los noodles aryento de la kaldera. Antes de azer el servis si vos plaze puedesh meter el bazil i una kuchara de parmesan. Kon pan tostado se traye a la meza.
Buon Apettito.
