Yom Yerushalayim es una fiesta nasional ke se selebra kada anyo en Mayo. Este diya se selebra la reunifikasion de Yerushalayim, i el establesimiento del kontrol de Israel sovre la sivdad vieja en el anyo 1967. El Gran Rabinato de Israel deklaro este diya tambien komo una fiesta relijioza para remersiar al Dio por la viktoria de la Gerra de Sesh Diyas, i de responder a la orasion de Pesah: ‘El anyo en viniendo en las tierras de Yerushalayim’.
Se selebra kada anyo kon festividades i eventos en Yerushalayim. Este anyo, el Diya de Yerushalaim empeso la tadre del 25 de mayo de 2025 i kontinuo fin a la noche del 26 de mayo de 2025.
Este anyo es el 58 en aniversaryo de la reunifikasion de Yerushalayim.
Yom Yerushalayim se fiesta kon seremonias del estado, servisios komemorativos para los soldados ke murieron en la gerra, konferensias sovre Yerushalayim, paseos en el sentro de Yerushalayim, i resitasiones de la orasion Hallel kon benediksiones en las Sinagogas. Ay tambien programes en la televizion.
En las eskolas del paiz entero, se da lekturas sovre la emportansa de Yerushalayim. Las eskolas de Yerushalayim selebran la fiesta kon reuniones festivas.
En los Estados Unidos i en otros paizes, Yom Yerushalayim se fiesta kon aktividades i selebrasiones komo en Israel.
En el anyo 2007, se selebro el kuarenten anyo de la reunifikasion de Yerushalayim. El slogan de las selebrasiones del anyo 2007 fue ‘Una Koza Espesial para Todos’.
En 2017, se selebro el Jubileo de Oro del Diya de Yerushalayim. El anyo entero, uvo numerozos eventos para komemorar el sinkuenten anyo. El tema prinsipal de las selebrasiones fue la "Liberasion de Yerushalayim". Un logo tipo espesial reprezantando el numero 50 dekorado kon luzes aparesio en la entrada de Yerushalayim.
Programes relijiozos se aparejaron para aksentuar la sinyifikasion espiritual de Yerushalayim en el Tanah. La Marcha de Kotel se aze kada anyo. A media noche, de diferentes puntos de kada sivdad, sienes de personas empesan a irsen a pie a la vieja sivdad de Yerushalayim. Esta marcha empesa a media noche para pueder arivar al Kotel a las sinko de demanyana, i pueder azer la orasion de demanyana en el Kotel. El Bayle de las Bandieras es tambien una otra selebrasion ke se repeta kada anyo. Este bayle empesa en el sentro de Yerushalayim, i el puevlo entra de todas las puertas a la sivdad vieja. El bayle se eskapa kon una seremonia en el Kotel. Un show spektakular se apareja en el muzeo Tower of David Museum, ke es un muzeo istoriko ariento de las paredes de la sivdad vieja por la Puerta de Jaffa. Akeya noche se apareja un show spektakular de luzes, i la istoria de la sivdad se reanima kon imajes i bozes.
