En un kazal aviya un ombre ke teniya un ojo siego. Un diya, se enfasyo de estar hazino en su kazal i desido de azer el torno de la sivdad, i ayego a un kazaliko chiko. Este kazal no paresiya a los otros kazales. Todo estava fraguado diferente. En observando, remarko ke los moradores de este kazaliko, eran todos siegos. Se penso: “Si estos todos son siegos, yo ke tengo un ojo, puedo ser el shefe de este kazal, komo el proverbo: En el payiz de los siegos, el ke tiene un ojo, es rey”. En avlando kon eyos entendyo, ke estos tienen un fuerte sentido del oyir i del goler.
Un diya muestro sinyor vido ke un siego se estava arovando el bien de un otro siego. Siguro, dingunos mas ke este ombre no lo vido. Ampeso a gritar… Ay ladron, Fulano se arovo el bien de Sistrano.
De ande lo supites? Ampesaron a demandarle. El, ampeso a kontarles ke el ve todo, mizmo de leshos puede ver lo ke se pasa. Ma en dinguna manera no estava puediendo darles a entender lo ke era “ver”. La djente del kazal le estavan demandando, kontamos, dizemos, kualo es ver? Mozotros mos dirijamos kon el bruido. Todo lo ke azemos, lo entendemos de los bruidos i del guezmo, mizmo si esta muy leshos.
“Bueno” disho el ke teniya un ojo, andavos a este tepe ke se topa a la fin del kazal… i azé djestos, i yo de aki vos va dizir lo ke veyo. Ansina dicho, se fueron al tepe, se asentaron en los bankos, el ombre les disho, “estash asentados en los bankos”. Despues ampesaron a komer, el ombre les disho “estash komiendo”. El savio de la sivdad ke se topava al lado del ombre, le disho “Esto ya te lo puedo dizir i yo, porke ya esto oyendo el bruido de las kucharas i de los chinis”. “Agora dizemos lo ke azen veremos” disho el savio… i todos los del tepe, entraron aryentro de una kuliba. Kontinuaron a komer. El ombre ke teniya un solo ojo, no estava puedyendo ver lo ke estavan aziendo porke aviya pared. Ma la djente del kazal estavan puediendo entender ke estan kontinuando a komer, porke puediyan oyir el mas chiko bruido de leshos, ke muestro ombre no puediya oyir. Su oido no era tan developado, komo los totalmente siegos.
Alora disho el savio: Tu sos mintirozo. No puede aver una koza semejante, tu tendras algun problema. Te vamos a egzaminar. Pishin yamaron al doktor siego del kazal. Vino el doktor i ampeso a egzaminarlo. Ampeso a palparlo el puerpo entero i vino sira a los ojos. Palpo el un ojo i sintio ke estava serrado, dunke no estava viendo de este ojo. En lo ke palpo el otro ojo, sentio ke el ojo estava avierto … i disho “Na! Aki tiene este ombre este problema, ke no esta puedyendo oyir de muy leshos komo mozotros. La solusyon es de siegarle i este ojo, para ke pueda oyir i goler komo mozotros.”
Esto ke oyo el ombre, ampeso a fuyirse del kazal a pie deskalso.
Esta konsejika se eskapa aki. Ma mos kere dar una leson.
LOS KE NO VEN, NO PUEDEN ENTENDER A LOS KE VEN. (Esta leson, en dizyendo “los ke no ven” no kere dizir “los siegos” verdadmente. Kere dizirmos los ke son inyorentes.)
