La vida de munchos mozotros esta kontinuando kon luchas i en koryendo. El buto de muestra vida esta leshos de ser orozos. La epoka en ke estamos bivyendo mos esta ovligando a tener butos finansyeros i estamos lavorando sin tomar reflo.
Me esto demandando, si estamos pensando a lo ke eksperimantimos, estamos revizando lo ke estamos azyendo?
Por egzempyo, kuando estamos merkando la araba ke sonyavamos, kualo estamos sintyendo? Unos kuantos dias estamos orozos de este akto?
Kuando estamos koryendo de detras de muestros butos, estamos peryendo la vida. No tenemos tyempo de azer mas ke lavorar kon la komputadora, ni pueder okupar de los ijos, ni pueder gizar, ni pueder kolaborar kon amigos, kon muestros paryentes. Solamente, si la madre i el padre son aedados, si les afito una koza negra, komo kayersen en la kaye u en kaza i si se rompyeron un lugar, deshamos el echo i koryemos para akudirlos. En la sigunda partida de muestra vida, ke ya deshimos el lavoro, una grava depresyon mos esta asperando.
Pensaremos ke tenemos 60 anyos i no tenemos dingun problem finansyal, i ya eskapimos de lavorar; kualo tenemos? Una mujer ke no syente un amor por ti, unos ijos ke ya se espartyeron de kaza i tyenen sus vidas kon sus ijos i otras kozas… Kualo sentimos alora? Una soledad emosyonal i arrepentimyento.
Mozotros somos personas ke tyenen shans porke savemos ke la vida tyene un empesijo i una fin, ke son un nasimyento i la muerte. Saver esto mos preokupa.
Syempre mos demandamos si muestra vida tyene una valor. Somos responsables de muestras vidas propyas. Mozos si estamos orozos, i el mundo sera mas sinyifikativo.
Kada demanyana avrimos la ventana i respiramos el ayre fresko de la demanyana. Kuando kaminamos vemos las ermozuras ke tenemos al doredor.
Estamos konsyentes de lo ke estamos bivyendo?
Lo mas emportante, estamos orozos?
Todos ya savemos ke un dia mos vamos a murir. Alora, desharemos las anksyedades, i miraremos kon un ojo pozitivo a la vida. No kale olvidar ke, una vida mala, traye una muerte mala. Saver lo ke estamos bivyendo es un paso para pueder trokar pozitivamente. Devemos dominar muestras propyas vidas. En las situasyones i evenimientos ande mos kedamos sin solusyones a la vida, saver ke es el problem es un paso ke traye una solusyon.
Somos unas personas a las ke mos gusta bivir oryantados a los problemes ke enkontramos en muestro kamino. En lugar de identifikar muestro problem, resolverlo i ir a delantre, preferamos kedarmos aya, engrandeser el problem en muestra kavesa i aogarmos en eya.
Algunas personas sufren porke eksperimentan i engrandesen esta dolor, i tyenen una grande probabilidad de narkozitarsen. Es muy difisil para estas personas trokar su perspektiva sin una ayuda psikolojika.
En este viaje de muestra vida, nesesitamos ser konsientes de lo ke estamos bivyendo, bivir kada momento kon konosimyento i volunta, es solamente muestra preferensya. Puedemos empesar a agradeser la respirasyon ke tomamos i el sorvo de agua ke bevemos.
No mos olvidaremos ke esta vida es un regalo presyozo para mozotros. Kale ver lo ke reushimos en la vida kon lucha i responsabilita dura.
Las reushitades mos dan felisidad, konfiensya i fuerza. Kon esta fuersa, puedemos trokar el punto de vista de muestra vida. Bushkaremos maneras de azer pasos kon muestro pasado i kon mozotros mizmos.
Es muy difisil para una persona ke no esta en pas kon si mizmo, estar en pas kon su entorno i kon su vida.
Daremos un paso i empesaremos por un lado a trokar muestras vidas. No mos olvidaremos ke “la vida no se puede komandar”. Bivimos lo ke esta eskrito.
