La dondurma es un dulse ke personas de todas las edades se namoran. Espesialmente en enverano kon los dias largos ke resiven los rayos solares direktamente, la kalor envelopa muestro puerpo entero i mos da gana de komer kozikas yeladas. La primera koza ke mos viene al tino es la “dondurma” ke akompanya muestros mijores momentos de la sezon. Este dulse tan dezeado tiene una istoria bastante antigua.
En unos livros de istoria dizen ke el yelo, “la dondurma” fue inventada antes 3000 anyos en el Oriente por los Chinos. Eyos preparavan una pasta de leche kon aroz, mesklada kon inyeve traida de las montanyas para konservarla. Despues adjustaron a este mesklo frutas i miel para dar mas muncha savor. Solo la alta sosiedad puedia konsomarla porke el koste era muy alto. Kon tiempo toparon otras teknikas para konservarla i “la dondurma” se empeso a ser mas popular.
Otros livros dizen, en la Edad Media (476-1453), en las kortes arabas, utilizavan la inyeve de las montanyas para azer la bevienda “el sherbet” kon frutas i se pensa ke el biervo “sorbe” nasio de esta palavra “sherbet”.
Kon el viaje de Marco Polo “la dondurma” pudo saltar del Oriente al Oksidente i yego asta la Italia. En el siglo XVI, en la boda de Caterina de Medici kon el rey Enrike II de Fransia, se sirvio “dondurma” durante 30 diyas. Es kon los Italianos ke “la dondurma” se empeso a konsumarse en Evropa i en el siglo XVIII, eyos se enkargaron para popularizarla i asi se empeso a apareser en los livros de kozina. Verso la fin del siglo XVII, el sisiliano Francesco Procopio, konsiderado komo el padre del yelado, invento una makina ke mesklava el yelo kon asukar i frutas para obtener una krema yelada. El avrio el Cafe Procope en Paris (oy mizmo en St.Germain), lugar de artistos i intelektuales, i kontribuyo a la popularizasyon de “la dondurma” i kon tiempo adjusto la vanilya i el chokolate.
Kon la kolonizasyon de la Amerika “la dondurma” izo un otro viaje i salto de la Evropa al muevo kontinente. Asi fue el empesijo del reino del yelado en la gastronomia mundial. Todos miramos kon guste a este yelo maraviyozo. Kon los anyos se indusrializo i se izo el produkto ke mos namoramos oy mizmo. Para chuparse los dedos, un enverano no se puede pasar sin “la dondurma”.
“Me gusta el enverano, me gusta la playa, me gusta banyar en la mar i me gusta muy muncho “la dondurma kaymak!”. Enverano bueno i saludozo.
