Todos ya savemos ke el kalendaryo Ebraiko es fasta el anyo 6000. Sigun esta teoriya kada 6000 anyos, un mundo se destruye, un mundo muevo se alevanta. Los savyos mos dizen ke las bushkas arkeolojikas mos mostran ke aviya milyones de anyos antes ke este mundo ya egzistiera, i una vez mas la sensya i la kreensya no estan siempre de mizmo avizo. Sigun el Mistisizmo es mostrado ke el shifro 6000 mostra ke es igual a las 6 etapes de la Kreasyon del Mundo, 6 diyas de la semana sin el Shabat, kada uno atado a una Sefira.
Ansi vemos este tablo.
Los primeros 1000 anyos ke son atados a la Sefira Hesed mostran la Buendad del Dyo Santo, ke permete a los ombres de bivir grasias a su buendad.
La sigunda Sefira es Justisya, Fuersa ke anunsia el Deluvio. El mundo ke se iva estruyir. La prezensya de Noah.
La tresera Sefira es Tiferet, Ermozura Briyo. Esta Sefira es la Luz del Dyo Santo. Salidura de Ayifto, el Dono de la Tora, kreyensa en las Leyes.
La kuatrena Sefira de 1000 anyos es Netsah, ke es Viktorya fin la eternitad. Esta Sefira amostra ke malgrado difikultades, el sigundo Beit Amigdash suvyo al mas alto nivel.
La sinkena Sefira de 1000 anyos es Hod ke se konose komo la Glorya i Justisya. Es una perioda de sufriensa, de Galutes, de ir de un lugar al otro, komo si el Dyo mos keriya kastigar de muestros pekados.
El sejen 1000 anyos, la Sefira Malkut, Reynado, es komo si fuera la salvasion. Si tadro de muestros pekados, esperamos serkamente un mundo de Luz, de Pas, i de Amor i Buendad kon la vinida del Mashiah tan asperado.
Nota: Las Sefirot son komo kanales de Luz, kaminos atados a la Luz Divina, mizmo si no estamos prontos a la vinida de Mashiah.
