Otruna vez un evenimyento relatado al mez koryente…
En Desembre de 1944, antes ke Eichmann pudo kompletar la deportasyon de los Djudios de Budapest i unos kuantos dias antes ke la kapital Ungara kayo en las manos de la armada korolada, Eichmann torno a Alemanya. Eichmann fue detenido poko despues por los amerikanos kuando deskruvyeron su identitad verdadera: el aviya empesado a bivir debasho un nombre falso, Otto Eckmann. Despues de fuir del kampo de detensyon amerikano en Enero de 1946, se eskondyo en un djiflik durante unos mezes i empeso a bivir en la zona de okupasyon britanika kon la identidad falsa de Otto Henninger. Djunto kon munchos kriminales nazis, en 1950 le fue konsedido un "sertifikado de induljensiya" de la Iglesia Katolika, ke le permityo de fuirse klandestinamente desde la Italia verso la Argentina kon la falsa identidad de "Ricardo Klement".
En esta epoka, Argentina se aviya konvertido en un refujio seguro para miles de kriminales nazis ke yegavan por el famozo "kamino de los ratones". Eichmann lavoro debasho un nombre falso en la fabrika de Mercedes-Benz. En 1952 tambyen arivaron su espoza i sus ijos. Agora teniya un pasaporto arjentino falsifikado kon el nombre de Ricardo Klement.
El importante rolo de Eichmann komo uno de los arkitektos de la "Solusyon Final" para los Djudios de la Evropa se empeso a saver verso la fin de los anyos kuarenta. Desde el empesijo de los anyos sinkuenta proliferaron rumores ke afirmavan ke estava bivyendo en Sud Amerika, komo ya savian kon sertitud los servisyos de intelijensiya de la Alemanya Oksidental i de los Estados Unidos. Ma fue grasyas a la determinasyon i persistensya de individuales desidados a topar la verdadera identidad de "Ricardo Klement", ke ajanes del Mossad de Israel empesaron operasyones i ke finalmente se eskapo kon la kaptura de Eichmann el 11 de Mayo de 1960.
Fritz Bauer, djuzgo jeneral (Djudio) del estado de Hessen, en Alemanya Oksidental, manovrando afuera de su rolo formal, transmityo al governo israeli la enformasyon solida sovre la lokalidad de Eichmann. Lothar Hermann, un sovrebivyente del Olokosto nasido en Alemanya ke aviya emigrado a Argentina, dyo al Mossad syertas enformasyones partikularmente kreivle resivida de su ija Sylvia, ke teniya relasyones romantikos kon uno de los ijos de Eichmann, Klaus. A esto se adjusto la intensa aktividad del investigador de Nazis, Simon Wiesenthal i del ajan del Mossad, Manus Diamant, ke topo una fotografiya de Eichmann de los anyos de la gerra. Kada uno a su manera aparejo el kamino para ke el Mossad planifikara i empesara la operasyon de kapturo.
En el ekipo de la operasyon aviya Rafi Eitan, Peter Malkin, Zvi Aharoni i Moshe Tabor. La operasyon fue dirijido por el shef del Mossad, Isser Harel, kon el apoyo i konsentimyento del primer ministro, David Ben-Gurion. Despues de kapturar a Eichmann serka de su kaza en la kaye Garibaldi, en un suburbio de Buenos Aires, sus kaptores lo yevaron rapidamente a un lugar asolado. Durante el interogatoryo, Eichmann admityo su verdadera identidad i firmo un dokumento dando su konsentimyento para ser djuzgado en Israel. Onze dias despues, fue yevado klandestinamente a Israel kon un avion de El Al.
Todos savemos lo ke afito despues…
