En vezes ay algunos divertimientos o algunas fiestas ke al lugar ke mos pase mahpul i mos alegremos, mos sale por la nariz. Oy vos va kontar un rekuerdo de mi chikez. Puedemos ver aki, komo se ven las mizmas kavzas por los ojos de los grandes i por los ojos de los chikos.
Mi padre era un ombre muy sensible ma era muy otoriter. Mos asentavamos en su pierna i el mos kontava konsejikas. Lo oyiyamos kon grande atansyon i admirasyon. Ma de otra parte mos espantavamos muncho de el. Kuando viniya del echo la noche, no mos estavamos muncho por en medyo. Kaliya ke uvyeramos eskapado las lesones, kaliya ke komieramos todo lo ke viniya a la meza. No puediyamos dizir “esto no me plaze”.
A mi padre le plaziya muncho salir kon su famiya, ir a un restorante del Bosfor, bever una kupika de raki, oyir muzika. En vezes aviya muzika grega o en vezes aviya muzika Ungareza. Era muzika biva kon orkestra. Mos ivamos lo mas a Güney Park o Kervansaray. Eran los lugares ke plaziyan muncho a mis paryentes. Aviya un muzisyen ungaro muy famozo ke se yamava Darvash. Verdad ke era un virtuoz grande. Kuando ya eramos mas grandizikas, mos yevavan i a mozotros porke no aviya ande desharmos.
Ya mos asentimos, ya komimos, ya avlimos, ya oyimos la muzika ermoza, ya mirimos las atraksyones… eeeeee mos enfasyimos, mos tuyimos, keremos alevantarmos; no ay permisyon. Kaliya asentar sin domeyarse. Ya mos vino esfuenyo… Akeya boz del akordeyon me burakava los oyidos. Despues de un tiempo, mas no era divertimiento, era “Ketana por sehora”. Mira! Mi papa aziya keyf kon una kupika de raki i dos-tres mezés, i mozos sufriyiyamos en estas nochadas ke no saviyan eskapar. Deke no komiya presto mi padre? Si ya eskapo de komer, deke no mos ivamos a kaza?
Despues de la muzika saliya una bayladera oryental. De ande salyo esta? Una mujer dezmuda ke aziya djilves a los klientes del restaurante i siguro i a mi papa: mos selavamos de mi padre i mos enkantavamos, deke no se selava mi madre?
Vos puedo dizir ke asta oy, me viene friyos kuando oygo la muzika del akordeon. Es un rekuerdo antipatiko de mi chikez.
