Ya vos konti ke me plaze irme a Paris para viyajar i kaminar. Kada distrikto tiene otra savor. No me difera, no digo djanim ye se vido, otruna vez me vo irme para kaminar mizmo lugares? Es komo me vo i kada vez tomo keyf de kaminar Pera, el Bosfor, Eminönü, Pier Loti, ets. Ansi me plaze kaminar los distriktos de Paris. Por egzempyo, no me enfasyo de irme i kaminar en la kaye de Champs Elysees. Me asento en los kafes del bulvar, bevo un kafe, komo una pasta ermoza i miro a la djente ke pasa. Ver de enfrente el Arc de Triomph. Kada vez me plaze ir a la torre Eifel. Tomo plazer de irme kon el metro i abashar en la estasyon de Trocadero i salir a la tarasa, i de aya ver la torre de enfrente. La Katedral de Sacre Coeur i la kaleja de atras ande se topan los artistos pintores. La plasa de Concord, La Katedral de Notre Dame, el sentro de Saint-Germain-des-Prés. La plasa de Opera, las guertas Luxemburg i Jardin des Tuileries, komo vos dishe i de dia i de noche tiene otra savor de bivir la sivdad. Para ken kome komidas Kasher, Paris entero es ganeden. Se topa munchas lokantas diferentes Kasheres. Komo se save la Gastronomiya de Fransiya es muy famoza en el mundo entero. Lo mas muncho ke se konose es el Krep, la Salade Niçoise, el Kish ke se aze kon siertas zarzavates, el Ratatouille i la supa ke vos va kontar agora, Supa de Sevoya. Una noche me fui a komer a una lokanta, en mirando a la lista el garson me disho kale ke beva la supa de sevoya ke es muy savroza. Fin akel tiempo no aviya bevido esta supa, kuando gosti me plazyo muncho. Le demandi komo se aze i me konto. I aki vos partajare la resefta.
Materyales
4 Sevoyas sekas grandes
2 Dientes de ajo
2 Ojas de Aurel
2 Ramos de Oregano
100 gr Manteka
2 lt Agua de karne
3 Kucharas de arina
Sal
Pimyenta preta
5 Revanadas de pan baget
200 gr de Kezo Gruyere 2 Emmental
Aparejar
Las sevoyas i el ajo se kortan komo piyaz i se echan aryento de una kaldera onda kon la manteka, oregano i el Defne se aze kon lumbre a poko sote. 20-25 minutos kon una kuchara se aboltan los materyales avagar avagar para ke se agan karamelize. Kuando toma un poko de kolor las sevoyas i se ablandan buen karar, se kitan los ramos de oregano i el aurel de aryento de la kaldera, se mete aryento la arina i se sofriye 5 minutos; despues se mete aryento el kaldo de karne i se aspera 20 minutos para ke se buyga. I despues se aze servis al las chanakas de supa. En trayendo a la meza se mete una revanada de pan i ensima el kezo i se mete al orno para ke se toste el pan i el kezo i se traye a la meza.
Bon apetit.
