En Hollywood, munchos artistos judios trokan sus nombres, no avlan sovre sus orijines. Barbara Streisand nunka fue una de esta majorita. La kantadera i artista, una de los ikonos de Hollywood, publiko sus memorias en el livro, "Mi nombre es Barbra".
En su otobiografia, Streisand inkluyo referensias a su erensia judia, empleyo munchas palavras en yiddish i yevo los lektores a un viaje de su chikes en Brooklyn, ande fue engrandesida segun las tradisiones judias.
Streisand nasio en Brooklyn en 1942. Eya asistio a la sinagoga ortodoksa kon su nono i tambien asistio a la Yeshiva de la Eskola de Brooklyn. Su padre murio kuando Streisand tenia solo 15 mezes. Streisand bivio en la kaza de su nona asta ocho anyos i duspues pasaron a un bario un poko mijor en Brooklyn kuando su madre se kazo de muevo. El primer spektakulo de Broadway ke Streisand asistio fue "El diario de Ann Frank", ke se estava prezantando desde 1950. Yena de sentimientos de admirasion i ambision, Streisand, ke tenia 14 anyos, desidio a djugar el rolo de Ann Frank en Broadway. "El espektakulo me aviya fasinado", eskrivio Streisand en su livro. "Ann tenia 14 anyos, i yo tambien. Eya era judia, i yo tambien. Deke no iva pueder enterpretar este rolo?"
En su livro, Streisand eskrivio un paragrafo largo sovre sus raizes, su judaizmo i sovre Israel.
"Me engrandesi en una kaza modesta en Brooklyn, kon la doloroza mankura de mi padre. Esta piedridad afekto mi alma, ma tambien me ambezo a apoyarme a mis raizes. El judaizmo fue un abrigo de identidad i konsolasion de mi chikez. El judaizmo no era solo una relijion, era mi erensia, mi istoria, el eko de jenerasiones ke iluzyonaron la libertad i la dinyidad; era mi raiz, la flama eternel ke esta kemando en la alma de mi famiya.
Me engrandesi sonyandome senarios imposivles. Disheron ke no paresia a una estreya. Mi boz era diferente, mi kara tambien era diferente. Ma nunka kije ser otra persona. No me troki el nombre, ni me operi la nariz. Lo ke el mundo ve komo debilidad, yo lo konverti a mi identidad. I kon esta identidad sali kada vez a la shena, yevando kon mi no solo las kantikas, sino tambien los suenyos de jenerasiones ke se ambezaron a kantar mezmo en la dolor.
Oh Israel! Me esto akodrando mi primer paso a akeya tierra. Sinti una koza santa debasho mis piezes, una enerjia biva i antigua. “En Israel no vide solo un paiz, sino un milagro, un puevlo ke no se kanso de konstruir esperansa kon manos tremblantes, un puevlo desidido. Aya yori, riyi i me sinti en mi kaza".
El primer viaje de Streisand a Israel fue en 1984. En este viaje, Streisand inoguro el edifisio de ‘Estudios Judaikos Emanuel Streisand’, el nombre de su padre, en la Universidad Ebrea de Yerushalayim.
"Serri un serklo kuando avri el Sentro Mediko ke tiene el nombre de mi padre en el Instituto Weizmann. Keriya dar atras al mundo una parte de lo ke la vida me aviya dado: arte, memoria i amor. Porke me siento komo una artista ke kere ser un ponte entre el pasado i el futuro, entre lagrimas i kantikas, entre Brooklyn i Israel."
Todo tiempo ke va tener boz, va kantar por la ermozura de no olvidarmos ken somos i de ande vinimos.
