En vezes me demando? Es el pasado u el futuro, porke muestra jenerasyon parese apretado entre el almaryo de tel, i el iPhone. El tiempo esta pasando tan presto ke no estamos puedyendo dar karar, porke malorozamente el futuro no mos esta dando savor del todo. Todo empeso a dejenerearse, ay mil i una hohentas ke mos esta salyendo enfrente en este tiempo. Agora estamos ugrasheando kon la intelijensya artifisyal; mos va avrir una bela en la kavesa ke el mundo entero no va salir a bash, na aki lo esto eskrivyendo. Si un dia si sona la puerta, i si te ves enfrente a ti, no te shashireyes.
La teknolojia es bueno de una parte, ma de otre parte si mirash, tiene problem, tengo espanto ke lo ke vemos en los filmos se va realizar.
Agora ay televizyon, avlar no ay, todos estan okupados kon el telefon mobil, avlar no ay, manko ke seya este modo de teknolojia, no kedo ni konversasyon kon la famiya, ni kon amigos. Antes ni aviya televizyon, ni telefon, ni komputer; la kavesa estava repozada, porke syempre estavamos endjuntos kon la famiya, todo se aziya kon ayudo, aviya relasyon buena kon la famiya, kon los amigos, shakas, muabet, baylar, kantar, no komo agora; te parese ke mos izimos mudos. Delantre la teknolojia, la umanidad empesa a murir, porke todo empesa a azerse kon komputer, kon robotes. No solo la teknolojia es un problem, i tambien la ekonomiya. Antes el padre lavorava i mirava a la famiya entera, la para teniya valor, mos yevava enverano dos vezes a vakansas, i kada semana diya de alhad komiyamos ahuera. No komo agora, mizmo si dos personas lavoran es muy difisil para mantener. Los komeres ahuera, vakansas te lo ves en el esfuenyo. I malorozamente este mundo no esta abastando a dingunos, i por esto no ay repozo en la vida.
Ke pensash, pasado u futuro? Dias buenos kon sanedad, i kon alegriya.
