En el kinzen siglo, el rey Ferdinand i la reyna Izabel ekspulsaron los judios de la Espanya. "Ferdinand emprovesyo su puevlo i a mi me izo riko" disho Beyazid II en akseptando los judios en su paiz. La kreensia de Beyazid ke los judios enrikesieron su paiz tuvo munchos rezultados.
Los judios izieron una grande kontribusion al Imperio Otomano, espesialmente en los kampos de ekonomia, medisina i politika. Las fuertes koneksiones komersiales de los judios sefardis entre Evropa, el Mediterraneo, el Oriente Medio i el norte de Afrika dieron a los otomanos un grande avantaje en el komersio internasional. Los ermanos David i Samuel Ibn Nahmias establesieron la primera imprenta del Imperio Otomano i empesaron a emprimar livros ebreos. Esto kontribuyo no solo al dezvelopamiento ekonomiko ma tambien al dezvelopamiento kultural del Imperio Otomano. Por egzemplo, grasias al poder ekonomiko ke aseguro al Imperio Otomano, Jozef Nasi, konosido komo Duk de Naxos, era un amigo intimo de Soliman el Manyifiko. Jozef Nasi era uno de los finansieros de grande konfiensa de Selim. La kontribusion judia al Imperio Otomano no se limito kon la ekonomia. La majorita de los medikos ke lavoravan en el palasio otomano eran judios. Joseph Hamon i su ijo Moses sirvieron komo medikos prinsipales en el palasio otomano i fueron los medikos personales de Soliman el Manyifiko.
Una de las kontribusiones de las mas emportantes de los judios a la medisina son las ovras traduizadas. Los judios, ke trusheron la medisina de Evropa i Andalusia al Imperio Otomano, akseleraron enormamente la difuzion del konosimiento mediko al traduizir las ovras de medikos komo Ibn Sina i Hipokrates al ebreo, al arabo i al turko otomano.
Otro nombre emportante ke kontribuyo a la medisina es Jacob Ben Gaon. Espesializado en produksion de medikamentos i farmakolojia, Jacob tambien lavoro komo mediko personal de Fatih Sultan Mehmet. Yevo una kantidad emportante de konosimientos medikales desde la Evropa al Imperio Otomano.
Durante la Primera Gerra Mondial, uvo organizasiones judias en el sektor tekstil de Estambol. La majorita de los lavorantes del sektor tekstil, ke se konsideravan judios, eran proves.
Evliya Çelebi mensiona syertas profesiones pratikadas por los judios. Los judios lavoraron en los servisios edukativo, finansiero, munisipal, i en el ministerio de eksterior. Produizaron medikamentos en laboratorios farmaseutikos i, grasias a la Aliansa Israelita Universal, los judios resivieron formasion profesional en las eskolas de agrikultura i en las enstitusiones de aprendisaje.
Los judios tambien proporsionavan servisios telefonikos a los evropeos. Tambien aviya judios ke sirvieron en la Organizasion de la Polisia. Los judios tambien fueron intermediarios en la rezolusion de problemes finansieros kon los evropeos.
Malgrado todo esto, los derechos de los judios en el Imperio Otomano eran limitados, komo los de los otros non-muzulmanes. Los judios deviyan de pagar un impuesto elektoral.
Ma, no se keshevan porke aviyan enkontrado refujio en el Imperio Otomano.
