Keridos lektores, fin agora vos eskrivi las salatas del mundo ke komi en viyajando. Mi kerida mujer, Diana me disho, kuando vas a eskapar la seriya de las salatas, empesa si keres las supas ke bevimos en viyajando en el mundo. Me plazyo esta idea. De agora en delantre vos kero eskrivir sovre las supas ke komimos en paizes i sivdades diferentes. En el mundo entero se kome kon muncho plazer la supa. Para empesar se beve en primero supa. Kuando estamos hazinos mos azen supa de Gayna kon fideyos. Dizen ke esta supa se kome kon limon i pimyenta preta. I lo yaman a esta supa Antibiyotika natural. Vos puedo dizir ke komi i gosti en todos los lugares del mundo la supa spesyal de la sivdad ke vijitimos. Siguramente las savores de todas las supas no me kedo en el tino; vos va eskrivir mas muncho lo ke me kedo la savor en el panadar. Me esto akodrando en Paris bevimos la supa de Sevoya ke se yama Soupe a l’oignon, en Madrid la supa ke se beve yelada, Gazpacho, en Milano la supa ke se apareja de zarzavates, Minestrone, en Moskov, bevimos la supa Borsh, en Budapest bevimos la supa Gulash. Tambiyen se aze i la komida de Gulash. En Bangkok me akodro ke la supa Tom Yum Goong era pikante i agra, en Porto bevimos la supa Caldo Verde, en Marakkesh bevimos la supa Harira. Mos kontaron en las sivdades del Norte de Afrika komo Marroko, Tunisia, Libya los Djudyos en Kipur en kortando el taanit beven esta supa. Antes 25 anyos por la primera vez en mi vida bevi la supa de Brokoli en Chekya. Este kadar ke me plazyo la savor le dishe a mi kerida mujer ke me aga esta supa. Se ambezo i me izo.
El materyal de las supa es el kaldo de karne o de gayna o si no de pishkado. Aryento de este kaldo se mete diferentes zarzavates, o fideyos si no makarones o arroz. Tambiyen karne, gayna i pishkado son el materyal ke se mete aryento de las supas.
En la Evropa i en la Estados Unidos renkontrimos botikas ke venden solo salatas. Tambiyen vimos botikas ande aviya solo mas de 20 modos de supa. En kaminado las sivdades de la Turkiya en kada distrito aviya diferentes supas. Por egzempyo en el norte de Turkiya, en el bodre de la Mar Preta, las komidas i tambiyen las supas se azen kon Kol Preta. En el sud, mas muncho las supas se azen kon karne komo Analı kızlı o Beyran. En la Turkiya entera se topa en los restorantes la supa ke se aze kon lentejas koloradas Mercimek çorbası o Ezo gelin. En las bodas de los kazales aparejan para los musafires, la supa de boda ke se yama Düğün Çorbası. En los kazales de Anatolia kada enverano aparejan el materyal de la supa Tarhana. En los Mallebidjis se topa la supa de Gayina. Tavuk suyu chorba. Ay botikas ke venden solo la supa ke se yama en Turko Ishkembe i Kelle Pacha. Desde agora va empesar a kontar estas supas ke bevimos en viyajando en el mundo.
