YUVAL RAFAEL (Yuval Raphael), sovrebiviente de la ataka de Hamas en el festival de muzika Nova, va reprezantar Israel en la Eurovision 2025.
Raphael, de 24 anyos, gano kon la kantika "Hakochav Haba" (La Estreya Ennaltesiendo) kon la mas grande kantidad de votos del juri i del publiko, i va kompetir en el konkurso de kantikas en Basel, Suiza, este mayo.
Entre trenta i siete payizes, esta kantika esta okupando la kuatrena sira segun las kazas de apuestas. El nombre en inglez ‘A New Day Will Rise’’ (Un diya muevo va amaneser) esta avlando sovre la esperansa i la reziliensia en frente de la piedrita.
"La muzika es una de los engredientes de las mas fuertes en mi proseso de sanarme" disho Rafael. La kantadera amatora estava kon sus amigos en el festival Nova kuando fueron atakados por teroristos de Hamas el 7 de oktubre de 2023. Sovrebivio eskondiendose debasho los montones de kadavras en un refujio debasho de los abrigos de las bombas.
Raphael disho ke suksesivos grupos de teroristos aparesieron, i avrieron fuego en el refujio para asegurarsen si todos estavan muertos, asta ke fue salvada por tropas de las Fuerzas de Defensa de Israel (FDI) despues de ocho oras. De las 40 personas ke estavan en el refujio, solo 11 salieron bivos. Raphael disho ke dainda tiene pruevas de la ataka, en la kavesa i en la pacha.
Durante el final del konkurso, Raphael, kanto una version de "Dancing Queens" dedikandola a "todos los anjelos" ke fueron asasinados en el festival.
Duspues de las atrosidades de Hamas, Raphael avlo en el mundo entero sovre su eksperiensia, mezmo en el Konsejo de los Derechos Umanos de la ONU en avril de 2024.
"Vide munchos orores indeskriptivles: amigos i deskonosidos fueron firidos i asasinados delantre mis ojos” disho Rafael. “Kuando los puerpos de los asasinados kayeron sovre mozotros, entendi ke eskonderme debasho de eyos era la sola manera de sovrebivir de este esuenyo negro”.
Yuval Raphael, de Ra'anana, disho ke kere reprezentar Israel en Evropa kon una pozision de fuersa i kon orgulyo por su payiz. “Kero kontarles la istoria del payiz, lo ke paso, lo ke otros bivieron”, disho en una entrevista en el program antes del final. “Kero kontar la istoria, ma no de una pozision de bushkeda de piadad. Kero ke seyga de una pozision de firmeza delantre los yuhaladeras ke va vinir del publiko’’.
Este anyo komo el anyo pasado, uvo yamadas de boykot ma EBU desidio una vez otra ke Israel va partisipar al Eurovision de este anyo.
