Renan Koen, La Memorya de Odio de una Sivdad
Un artikolo en el periodiko semanal de Iskenderun SES, publiko un raporto sovre los lavoros muevos de Renan Kohen, pianista, kompozitora, soprano, i muzikoterapista.
Su lavoro muevo, sovre “la memorya de odio de una sivdad” es un lavoro sovre la transformasion de la musika i la istorya de Hatay en una memorya sosial.
Los abuelos de parte de su padre vyenen de Mersin. Por esto, kon esta kultura ke se engrandesyo, kuando afito el terromoto grande, esta kultura tomo una ferida buena. Achakes de esto, para ke no se desaparese, empeso a tomar bozes de los sivdadinos. Afilu las kantikas i las istoryas. Desde ke nasyeron fin al tiempo del terromoto. Este lavaro se va arekojer en livros, en videos i en el YouTube kon kaji 120 reportajes. El patronizador prinsipal de este proyekto fue la kompanyia Alarko. Felisitamos a Renan Koen por este lavoro. (www.iskenderunses.net)
Novelas de la sivdad SantCugat
Ay tres mezes ke esto en Barselona. Una sivdad serka de Barselona, se yama SantCugat. Una sivdad chika aryento de las sharas. En 28 Avril en Espanya entero, afilu en Portugal i en el sur de Fransia, kedaron en un momento sin elektrisita, sin komunikasyon, sin internet. No lavoro nada, metros, trenes, tramvayes. Los restorantes, los supermerkados se serraron, la djente no supo, komo se van a ir a sus kazas. Los otobuses estavan yenos. Muncha djente aviya en las kayes ke kijyeron ir kon otostop. Espanya es un paiz kalmo, nunka tiene muncho trafiko. Ma akel diya fue un trafiko desgrasiado. No pudo fonksiyonar las semaforos. Fue djente ke kedo en el treno i se durmio aya, para pasar el dia. Los ATMes de las bankas no fonksiyonaron. La djente se apersivyo la importansa de la moneda de su portmone. Mas i mas unas personas kedaron en las kamas de los ospitales aparejados para operasyones. Kedaron en los asansores. Esto todo paso a poko a poko se kalmo i ya paso. Todo se enderecho. Esto fue un kavzo porke en supito se ennalteso el voltaj. I tambien porke Espanya da elektrisita a Portugal i a Fransia kedaron i eyos sin elektrisita. Ma Bendicho al Dyo, no afito dingun mal. Porke immedyatamente se arekojeron todas los komisyones de emerjensia. Esto realmente es una grande reushidad para un payiz i para una administrasyon.
