Ay kaji 2 mezes en esta pajina vo esto eskrivyendo las salatas ke komimos en viyajando en los paizes del mundo. Fin agora vos eskrivi las salatas de Fransya, de los Italyanos, del Brasil, de las izlas Bahamas i de Meksikanos, de los Rusos, del norte de Afrika de los Marokanos, del leshano oriente de Malezya, de los vizinos ke son la Georgia, Bulgaria i Gresya. Iva kontnuar kon mas paizes ma miri ke esta todo paresyendo uno al otro.
Si estash konsientes de todo modo de salata, los materyales son lichua, tomat, pipino, pipirushka i sevoya. Por la sos absolutamente se mete azete, limon o vinagre. En vezes yogurt o mayones. En vezes se mete gayna, anchues, guevo, patatas o diferentes zarzavates komo karota, kol, berendjena ets. La sivdad muestra porke es muy grande, kada distrito tiene su spesyal salata. En oriente son diferentes, en oksidente son diferentes. En el bodre de la Mar Preta (Karadeniz) son diferentes, en el bodre de la Mar Mediteraneo son diferentes. Kada distrito tiene otras savores. En la parte de la mar Egeo, las salatas se aparejan mas muncho kon las yervas de la rejyon. Las salatas de Gaziantep o Hatay kedaron en la influensia de los Arabos komo Gavur dağı, la salata ke se apareja kon salsa de tomat i pipirushka pikante Muhammara, la salata de Zahter, la salata de Azetunas, la salata ke se aze kon ispinaka Borani, la salata ke se apareja kon berendjena Abagannush, ets. Las salatas del Egeo ke se konosen mas muncho son Borulce i la salata ke se aze kon Endjinara. En las mezas de la sivdad entera de Turkiya kaji se aze i se topa komo salata, el Trushi. De todo modo de frutas i zarzavates se puede azer el Trushi i es muy savrozo i avre la gana.
En viyajando las sivdades, aviya una salata, ke komi solo en Turkiya. Esta salata era el Piyaz. No vide ni komi en dingun lugar del mundo. Aki komemos kon diferentes komidas. Al lado de las koftes fritas o asadas, al lado del burek, kon las frituryas ke komemos en enverano, berenjena, kalavasa, i pipirushka ets. Yo vos va kontar el piyaz ke se save i se aze en la sivdad entera. Mas de esto ay el Piyaz ke se aze i se yama piyaz de Antalya. A este piyaz a la sos se mete tahina.
Materyales:
Una kupa de avas sekas
½ Sevoya blanka o kolorada o si no sevoya freska
1 Tomat
½ demet de Prishil
1 Kuchara de supa de Vinagre
1 Kuchara de supa de limon
3 Kucharas de azete de oliva
1/2 Kuchara de chay de Sumak
½ Kuchara de chay de Paprika kolorada
Sal
Aparejar:
Las avas sekas se meten en mojo de la noche
El diya sigiente, se kozen fin ke se ablandan
Despues ke se yelaron, se vazya la agua
La tomat se korta chika en kubos, tambiyen la sevoya se korta komo voz plaze, i el prishil, todo se mete aryento de un chini ondo. El vinagre, limon i la azete i la sal se mete ensima i se karishtereya.
Para el dekor se mete azetunas i guevo haminado i se aze el servisyo.
