Un terremotto es un fenomeno natural ke afita en la tyerra kuando ay una liberasyon subita de enerjiya akumulada en diferentes partes de la planeta.
Esta liberasyon de enerjiya provoka la jenerasyon de ondas sismikas ke se propajan al entorno de la tyerra, kavzando vibrasyones u movimyentos en la superfisiya terrestra. Estos movimyentos pueden varyar en intensidad i son kapaches de kavzar munchos danyos.
En el mundo entero komo muestro paiz uvo munchos rashes ke kavzaron dezastres, seyga de personas, seyga de derrokamyentos de edifisios, i munchos otros.
El rash en Chile en el anyo 2010, fue kon una rezistensya de 8.8, a una profondidad de 30 metros debasho de la kashkara terrestra. Sureyo 4 minutos i fue un muy grande destruimyento ke se sintyo en Santiago, Buenos Aires i Sao Paulo.
El rash en la Japonya en el anyo 2011, fue kon una rezistensya de 9.2, provoko un tsunami de mueve metros de altura ke danyo munchos reaktores nukleeres. Este fue el rash el mas grande en la istorya de la Japonya. El total de viktimas mortales konfirmadas i desparesidas fue mas de 22.000, kon 20.000 muertos i 3.000 desparesidos.
El shabat del 17 agosto 1999, Estambol en Turkiya ke es la kapitala ekonomika del paiz, tuvo un rash de magnitud 7.4 ke kavzo la muerte de 19.000 personas. Este rash fue a las 3.00 de la demanyana, i munchas personas ke estavan durmyendo se muryeron. 5.850 personas desparesidas i 49.000 personas firidas. Ma malorozamente el paiz no tomo leson de esta grande katastrofa. 120.000 edifisyos fueron kompletamente destruidos en 1999, asigun la ofisina de Nasyones Unidas para la prevansyon de dezastres, en grande parte por la konstruksyon manka de los edifisyos. El rash fue akompanyado de un tsunami en la mar Marmara kon olas de asta 3 metros, i un fuego en una rafineria de petrol.
En 2020, la sivdad de Elazığ se sakudyo kon un rash, i Adıyaman kon la sivdad Kahramanmaraş fueron gravamente afektados.
Asigun un professor, la dramatika perdida de bivos es a kavza de la konstruksyon de los apartamentos, i la inyorensya en la industria de la konstruksyon.
El rash de 23.04.2025 fue bastante fuerte kon una rezistensya de 6.2 en Estambol, i kreo una panika grande entre los abitantes.
La Turkiya se topa entre dos grandes fayes jeolojikas i sufre de terremotos kon regularita. El terremoto del 23 april fue kon una profondidad de 13 kilometros, i a 24 kilometros en la parte de Silivri, asigun mos aklaro el “Sentro Sismolojiko” de Kandilli.
151 personas fueron firridas, a kavza ke saltaron desde las alturas, kon la panika ke tuvyeron. Ma orozamente ke no uvo muertos.
El Ayuntamyento de Estambol i del Governo Sentral, estiman ke entre 500.000 i 600.000 edifisyos puediyan ser muy danjerozos en kavzo de un rash superyor de 7 grados.
Estambol es una sivdad de 16 milyones de abitantes, ke se topa en las dos partes del Bosfor, en la parte evropea i en la parte asiatika.
Aze dos anyos, ke la Turkiya sufriyo el rash el mas fatal i destruktivo de su istorya moderna. Es el terremoto de magnitud 7.8 ke fue en febrero del anyo 2023, i kavzo la muerte de 55.000 personas i mas de 107.000 personas firridas. Malorozamente los rashes son desgrasyas naturales ke no se pueden saver de antes.
Keridos Lektores, eskritas buenas a todos i el Dyo ke mos guadre de las kozas ke no mos puedemos guadrar. AMEN ve AMEN.
