Un arkitekto estava renovando una kaza viyeja. Vido ke las enstalasyones estan viyejas tanbien. Yamo a un plombero (tesisatçı). Estava un echo difisil. Despues ke lavoro el plombero diya entero i estava bien kansado, se fue a su kamyonet para tornar a su kaza. El ke ve? La karucha estava burakada. “Solo esto me mankava!”. Disho. No aviya nada ka azer, Abasho i troko la karucha. Despues se suvio a su kamyonet i abolto la yave, esta vez el motor no lavoro. Sovre esto el arkitekt le propozo de yevarlo asta su kaza kon su oto.
Kuando yegaron a la kaza, el plombero envito al arkitekto a su kaza para azer konoser a su famiya. En el kamino, el plombero se estuvo delantre de un chiko arvoliko ke se topava al bodre de la puerta de kaza, i toko i fishugo kon sus dos manos, las ojas de esta arvoliko. Kuando arivaron a la puerta, un momento antes de avrir, paso una koza maraviyoza. Su kara kansada, se ampeso a iluminar kon una sonriza grande i kontente. La puerta se avriyo, abraso a sus ijos, los alevanto al ayre kon alegriya i le dio un beziko a su mujer.
Se penso el Arkitekto: No me lo kreyi. Este ombre ke aviya pasado un diya tan duro, se aviya transformado ensupito en una persona yena de vida, kontente i kon muncha enerjiya kuando entro a su kaza.
A la fin de mi vijita, despues ke pasimos una ora agradavle kon su famiya, el plombero me akompanyo asta mi oto. Pasimos del lado del arvole, mi kuryosita era tan grande ke no me pude detener i le demandi: “Kualo era lo ke izites kon el arvole?”
Me disho: “Ah! Es muy simple. Este arvole es mi arvole de dertes. En mi echo, es emposivle de no tener problemas i dertes. Ma ay una koza sigura ke estos dertes no son ni de mi mujer, ni de mis ijos. Ansina es ke kada ves ke torno a kaza, enkolgo todos los dertes del diya al arvole, i arogo al Dio ke se okupe de eyos. Despues al otro diya, la demaniana antes de salir, me vo al arvole i torno a tomar los ke kedaron aya. I saves una koza? Es un mirakulo, ma kada vez ay munchos mas mankos dertes de los ke enkolgi una noche antes.
Ken save? De verdad es ke su Dio se okupa de sus dertes mientras ke el durme? O es ke las oras ke pasan nos da una otra perspektiva de las kozas. (Vale la pena de aprovar).
