Las komunidades ke no pueden transmitir sus kultura i tradisyones a las jenerasyones futuras estan kondanadas a desapareser. Ya eskapimos otrun Pesah kon sanedad, ansi ke para muestras mujeres es un poko kanserya, ma los preparativos i las prisas se transforman en felisidad kon la meza de la Agada i del Seder.
Las eksperiensias se eskonden entre las ojas de istorya i los livros relijyozos, son en realidad lesones, syempre ke sepamos komo tomarlos.
El Pesah mos ambeza munchas lesones, la primera koza ke mos ambeza es la valor de la Libertad. Bivyeron kaji syen anyos El Bene Israel aryento de Misrayim komo esklavos, i dospues vyeron la luz del sol. Mos ambeza ke los milagros pueden vinir en los momentos mas difisil, komo la Mar Kolorada, lo emportante ke tyenes de azer, kreyer i dar un paso, mos parese ke, milagros son los akontesimyentos sovrenaturales del Dio, no si kreyes kuando estas kon problemas, syempre puedes enfrentar, solo kreye.
Una de las lisyones emportantes es, no seas ojo vaziyo, al kontraryo puedes pedrer lo ke tyenes, si saves kontentarte kon lo ke tyenes, la abundansya ya te topa.
Te ensenya a ser respektuozo kon todo lo ke toka pozitivo a tu vida, te ensenya estar desidido, i no renderse. Komo izo El Bene Israel.
I por esto mos asentamos en el entorno de la meza noche de Pesah i antes de la Agada dizimos, Ken tyene ambre venga i koma, Ken tyene menester venga i paskue, i empesamos a meldar la Agada. En la meza se topa un grande chini de Seder ke konta toda la istorya, en el chini de Seder, oja de apyo i al lado ajo, lichua, haroset, guevo, i un pedaso chiko de kodrero. El kodrero mos akodra los korbanes del Mishkan, la oja de apyo, el agro, i la lichua mos akodran lo ke travaron en Misrayim, el haroset es el lavoro kon lodos, i el guevo es la vida.
La mas emportante ensenyansa es la meza, mos arekoje en el entorno, los pransos de fiestas se azen al rededor de la meza, los ke se aravyan vyenen lado kon lado para azersen pas, las problemes kon los amigos se solusyonan en la meza, i para pas, para sanedad, para amistad, i para alegriya Le Hayim se dize en el entorno de la meza. La meza es un espejo, de la vida, de la kaza, i de la famiya, si estan yenas las siyas mira ke es maraviya ... Syempre mano kon mano, i syempre adelante.
Un abraso grande a todos.
