La perasha nombrada Tazriya vyene a ambezarmos, lo bueno ke es, de no danyar a ningunos kon los biervos ke kitamos de nuestra boka. Pero si la persona auzo a su boka a avlar mal, porke kere ke seya, lashon ara, palavras non buenas, i raportar palavras ke pueden sontraer danyo a la djente, i a el mundo, no ay dubyo ke la pena es muy fuerte. En el livro mishle de Shelomo Ameleh meldamos: La vida i la muerte estan dekolgados en la aluenga de la persona; el ke empleya su avla para bueno alarga su vida. A la kontra, malorozamente danya su vida i su salud. Sontrae a si mizmo angusya. El biervo metsora tsaraat, lepra ke meldamos en le perasha de esta semana, lo eksplikan muestros savyos Motsi Shemra: kere dizir el ke kita fama mala, la konsekuensa es, de apenarse kon estas yagas.
Dizen nuestros savyos: La espada puede danyar a uno ke esta serka. La persona kon su aluenga puede danyar al ke esta leshos de el.
Lashon ara es un defekto de los mas grandes, igual a sirvir idolos. Miryam se apeno de parte de el Kriyador solamente porke avlo kontra su ermano, Moshe Rabenu.
Kuando se milizino, el ke se danyo kon la lepra, se yevava al santuvaryo, al Koen dos palombikas por korban. La sinyifikasyon es ke ya se iva aripintir de chuchulear komo los pasharikos i guadrar su aluenga.
En la orasyon de la amida rogamos a el Kriyador: Mi Dyo, guadra a mi aluenga de avlar mal, i a mis lavyos de avlar mintiras. David Ameleh, en el livro Teilim, dize: i ke es el varon ke envelunta vidas? Estima su vida i kere ver bueno? Ke guadre a su aluenga de mal, i a sus lavyos de avlar mintiras. Tirate de lo negro, aze syempre lo bueno, bushka la pas i presigela.
La perasha de Metsora nos enbeza lo bueno ke trae a la persona la avla buena; de entremeterse la persona kon palavras de ley i mitsvot, la persona tyene paga buena del Kriyador. Ma la kontra, si se auzo la persona avlar lashon ara, palavras non buenas, i de raportar palavras ke va traer danyo a su serkano, a su amigo, la pena es muy fuerte.
Dizen nuestros savyos, kon la espada se puede dar fin a la vida de la persona ke esta serka de su inimigo, ma kon la aluenga puede matar; kere dizir puede danyar a alguna persona malgrado ke esta leshos de el. Lashon ara, avlar mal entra en un grupo de pekados fuertes komo "avoda zara", sirvir idolos, i verter sangre. Miryam, la ermana de Moshe Rabenu se apeno kon yagas de lepra solo porke avlo por Moshe Rabenu, ke se separo de su mujer despues ke devino profeta. De este kavzo puedemos entender ke karar de grande es la pena de este defekto.
