Esto meldando un livro de Jules Payot. El nombre orijinal es: “L’education de la volonte”. En 2018, se tradusio al Turko “İrade Terbiyesi”. J. Payot bivyo, entre 1859-1940. Era un edukador i pedagogo.
Influenso profundamente a los edukadores de la epoka, kon su lucha, por renovar la edukasion a un modo no solo proporsyonado, ma tambien asegurando la formasion de una voluntad rasyonal i fuerte. El livro se eskrivyo en 1893. Oy estamos en 2025.
Aunke ya paso mas de un siglo, no puedemos dizir ke la forma de la manseves ya troko. En kontrario, veo ke se aleshan den dia en dia mas muncho de una edukasyon sovre konstruir una voluntad fuerte.
El entrenamiento de la fuersa de voluntad no se toma en serio, ma esto es, lo ke aze umana a una persona. Vos rekomendo de meldar el livro i pensar enriva kon vuestras refleksiyones.
Kualo mos dize J. Payot sovre esto?
Ser desganado: El meoyo funksiyona ambezandose muevas formasyones i kozas. El sistem de edukasyon, oy en dia es aleshada de la kreativa. Kon el tiempo, esto aze el meoyo atrofado i atrazado. Kon un esforso poko ma ordenado es posivle ser produktivo. Aryento de la edukasyon, kale meter otras aktividades kulturales. Un filmo bueno, pasear aryento de la natura, en vezes vijitar un muzeo, aktividades de mano… un mansevo si no tyene ganas de lavorar es la mas grande falta para la fuersa de voluntad.
Olvidarse el objektivo presyozo: La manseves ve el lavoro mental, sin alegria i sin kolor. Ma el objektivo muestro es ser regular i turavle. Devemos esforsar a meter tino. Kale tener uzansas diaras. Esta manera se enfortese el kontrol de muestra voluntad. I es muy emportante ke estas uzansas seyan kontinuadas. Absolutamente tyenes menester de un plano sovre tu vida.
Deshar los impulsos: tenemos dos inimigos: haraganear i tomar plazer. Pasar el tiempo sonyando despierto es una eksperiensia haraganeada, da plazer. Te rova el tiempo bastante. Por modo de esto de noche, echar tadre, alavanar tadre es muy danyozo. Kaminar kon personas medyanos te aze i a ti medyano. Komer kozas sanas aze el meoyo aktivo. Asentar muncho tiempo no es bueno por tu salud. Kale ke lavores en los lugares de ayre fresko. No devemos neglijar a salir a kaminar kada dia mizmo si el tyempo esta friyo.
Aleshar de amigos negros: aleshar de las personas pesimistas. Porke te abashan syempre el moral tuyo, abasho. Aleshate de los haraganes. La media sosyal te rova el tiempo i te da mas munchas uzansas negras.
La persona ke lavora syempre mental, toma en su mano su vida oroza.
Despues de estas pajinas, Payot, empesa a dar konsejos a los edukadores. Komo se eduka un elevo feliz, atako, kreativo, sano i bivo. Vos rekomendo este livro, ke es una referensia para edukadores, familias i a los ke konstruyen las politikas eduktivas. I mas i mas echandovos una mirada a vuestra propia vida.
