Mez de Nisan, malgrado ke es tyempo de la primavera, el friyo esta entezando i los arvoles paresen eskondidos de inyeve. El Lunar de el 15 Nisan esta aklarando los montes entezados, ma ken son estas siluetas ke estan mirando de suvir la montanya. Delantre kamina un mansevo yevando en la espalda una chanta i doz pasos detras un ombre aedado tenyendo de la mano una ijika chikitika. "Nono, ande estamos indo kada noche? Estamos noche de Pesah grand papa…" "Muy bien, ke komiyamos la noche de Pesah chika SARALE? Kualo aviya enriva la meza?" "Matsa, maror, haroset". "Muy ermozo…" I kuantos matsot nono?" "Silensio, silensio estamos en perikolo grande, los Nazis i la Gestapo estan bushkando Judyos ke se estan fuyendo, silensio…" Unos kuantos pasos otros i Sarale demanda a la oreja del granpapa, "me estas prometyendo ke vamos pasar la mar kolorada, ke vamos salir de Ayifto?" demanda Sarale kon lagrimas en el garon, "no kero mas estar en Ayifto". Unos kuantos puntos pasan, kaminar se esta aziendo de punto a punto mas perikolozo, los kaminikos de inyeve estan entezados. El vyejo se areta, kansado i tremblando. "Yo no puedo mas, toma tu ija i fuye un punto mas presto". "Padre ya estamos serka de la frontiera, unos kuantos pasos mas padre kerido," "si nono me prometites ke no me vas a deshar en Ayifto, no me deshes la mano, i ya saves ke no te vamos a dechar en Ayifto, aze un esforso ya estamos serka de la fin de muestro Galut".
Sarale avla komo una mas grande de su edad. En este punto luzes aklaran el entorno, fares estan bushkando los fuyidos, komo bestiyas salvajes, todo modo de shans esta peryida. Sarale se echa a delantre kon un grito de ravya, koryendo, i gritando: no kero kedar en Ayifto. Un bruido de arma de fuego, la luz del far esta enriva la ijika serka de la frontyera. Sarale kaye i los dos ombres koryen el uno arastando al otro.
En las alturas, una solombra de un vyejo, kon barva blanka se aparese, toma a Sarale en sus brasos i presto la yeva a unos kuantos metros afuera la frontiera. Kuando los keridos de la ijika vyenen al lado, ven ke esta sonriendo, sana i rezya sin dinguna yaga. "Teniyas razon nono, Eliyahu Anavi vyene noche de Pesah, kaza a kaza, ke deshen las puertas avyertas para salvar a todos ke estan en perikolo de despareser, Eliyahu Anavi vyene el mizmo".
Ken era esta ombre i deke se desparesyo supito, deke no avlo? Los sielos solo pueden dizir la verdad. Sarale esta sana i rezya, un miraklo de noche de Pesah.
Despues de anyos, la gerra ya eskapo deshando un mundo de yagas…
El puevlo Judyo ke siempre nase de sus proprias sinizas komo el pasharo lejandero Fenix. Un estado muevo nasyo del pasado, una vida mueva de enerjia i de manseves.
Vini vijitaremos un Kibuts, en la Galile del norte. Noche de Pesah, mezas yenas de flores, rizas, kantes, vino de la rekolta israelyana, kupas yenas… Un Jurnalisto Amerikano vino para arekojer rekordos de este paiz muevo nasido. Kada uno konta su propria istorya triste, i sus esforsos en la tierra santa.
“Si keres una ermoza istorya, demanda a esta ermoza Sarale i su Miraklo bivido anyos antes.” I yo me aserki de Sarale i le demandi ke me konte su salvasion, su fuyida en tierras ajenas, mos konta el Jurnalisto. Kuando vyene a la salvasion de Eliahu Anavi, me riyi de esta kriyaturedad, Sarele me grito kon inyervo, "es la verdad, Eliahu Anavi vino i me salvo." En sonriendo me tomo en sus brasos i me yevo a un lugar siguro. Tomi la mano de Sarale en mi mano, no la deshi mas, es mi espoza i kada noche de Pesah kontamos esta istorya a muestros tres ijos.
