Ken eran los Moros de Espanya i komo vinieron a Espanya?
Durante los reynados de los reyes vizigotes de Espanya, las gerras avian kavzado munchos gastes i avia luchas entre eyos. En el anyo 711, profitando de la flakeza del reynado, un grupo de muzulmanes norteafrikanos, dirijados por el general Tariq İbn-Ziyad, paso el Gibraltar i konkisto la Peninsula Iberika. Los Espanyoles los yamavan “Moros”, unos dizen porke tenian piel oskura, otros dizen porke son orijinarios de Mauritania (puevlos desde el Norte de Afrika asta el Sahara).
Estos berberes, los Moros, avian visto ke la Peninsula Iberika es una tierra muy fertil i en ganando los kaminos komersiales van a pueder tener la oportunidad de propajar sus kulturas i savidurias izlamikas. Eran un puevlo muy avansado. Eyos trusheron la agrikultura, la industria, las matematikas, la fizika, la kimika i la medisina i fueron los primeros a introdusir los numeros Arabikos en Evropa, ke se uzan oy mizmo. Developaron tratamentos diferentes en medisina. Eran muy adelantados en astronomia i developaron teknikas para mezurar el tiempo. Izieron una kontribusion importante a la botanika del paiz i konstruyeron guertas manyifikas. Eran tambien ekspertos en grandes konstruksyones. Sus arkitektos krearon monumentos ekstraordinarios komo La Alhambra en Granada i La Meshkita de Kordoba. Avia una libertad de relijiones. Judios, kristianos i muzulmanes bivian en una armonia perfekta. Es en esta atmosfera kultural ke Moshe Ben Maimon, RamBam, mediko, filozofo i rabino se developo i enfloresio.
Todo lo bueno tiene una fin. Malhorozamente en 1154, los Moros invitaron a los Almohades, otros berberes muzulmanes del Sahara, para ogmentar el numero de soldados komo rezistensia kontra los kristianos, i en mizmo tiempo revitalizar la praktika de sus relijiones. Ma eyos eran muy fundamentalistos i destruyeron la armonia entre las tres relijiones. Kuando el ekstremizmo entra a un paiz, la manera del pensamiento troka i la kultura no topa su vokasion para amplifiarse.
En 1492, despues de munchas gerras entre las dos relijiones, Granada kayo en la mano de los Reyes Katolikos, Isabel i Ferdinand, i asi se termino una perioda de 800 anyos del poder izlamiko en la Peninsula Iberika. Esta viktoria ayudo a unifikar la Espanya debasho del poder katoliko i fundio la baz de la “Enkizisyon Espanyola” i en mizmo tiempo empeso la “Era de la Eksplorasion”.
De muestros dias, la influensia de Los Moros se siente en todas las kayes de Andalusia, kon sus monumentos, sus kolores i savores egzotikas ke se adjusto a la gastronomia espanyola. Penso ke esta sivilizasyon, en munchos sujetos formo la baza de muestra kultura sefaradi. Los sefarades ke desharon la Espanya, yevaron kon eyos un grande bagaj de saviduria a los paizes ke los adoptaron.
La mijor erensia ke un puevlo puede ofreser a sus desendientes es la kultura i el arte. Porke la kultura alimenta el intelekto de la persona i el arte alimenta su alma i sus ojos.
