Kontinuando de ande kedimos…
Las notisyas de las atrosidades en Damasko izo solevantar el mundo Djudio. El primer intento Djudio de intervenir en la situasyon vino de Aleksandria en forma de una petisyon a Muhammad Ali. En el mizmo tyempo, el konsul de Austria en Ejipto demando a Muhammad Ali de meter fin a las torturas.
Ali aksepto i embiyo instruksyones a Damasko. Komo rezultado, se metyo fin a la tortura el 25 de Avril. Ma, la akuzasyon no fue revokada i la investigasyon kontra los Djudios kontinuo. El konsul austriako, Laurin, intento de influensar el konsul de Fransia ma no reusho. En mezmo tyempo, El Baron de Rothschild, empeso a intervenir. Ma ni el no reusho.
Para alertar el opinion publiko fransez i mundial, Baron de Rothschild publiko el kavzo en la prensa. En Viena, su ermano, Solomon Rothschild se dirijo verso Metternich. Metternich apoyo Laurin ma sin grande boz porke no keriya malmeterse kon los Fransezes. De otra parte, a Laurin se adjuntaron el Konsul britaniko en Ejipto i otros konsules evropeos, ke lo apoyaron en su disputa kon los fransezes. Komo rezultado de estos esfuerzos, se embiyo un orden a Damasko el 3 de mayo de 1840, solisitando proteksiyon para los Djudios kontra la violensiya.
Myentras, la Komunidad Djudia oksidental empeso a protestar enerjikamente. Los Djudios de la Evropa oksidental, i spesiyalmente los Dudios de Fransya i Inglatiera, vyeron sinyos de un retorno a la oskuridad de la Edad Media. El kavzo alarmo tambyen a los Djudios asimilados i demonstraron sus reaksiyones. Los non-Djudios ilustrados tambyen protestaron kontra la akuzasyon en la prensa i en reunyones masivas. Una delegasyon Djudia, inkluido Moses Montefiore, su sekretaryo Louis Loewe, Adolphe Crémieux i Solomon Munk, partyo verso Ejipto i fueron resividos por Muhammad Ali. La delegasyon demando ke las otoridades de Damasko abandonen la investigasyon i ke manden a los akuzados a Aleksandria para una aklarasyon judisyal o ke el kavzo fuera egzaminado por arbitros evropeos. Esta petisyon no fue akseptada: Muhammad Ali komo los fransezes no keriya ke una investigasyon ampese sovre los eventos de Damasko. Para los Djudios, la primera preokupasyon era la liberasyon de sus korelijyonarios, dunke desidaron de akseptar la liberasyon de los prizonyeros sin dinguna deklarasyon judisyal de inosensya. A la fin, el orden de liberasyon se emityo el 28 de Agosto i los prizonyeros fueron salvados.
Montefiore i su delegasyon partyeron de Ejipto verso Konstantinopla, ande demandaron al Sultan para ke publike un firman ke proklaramara los libelos de sangre ser sin baza verdadera i defender los djuzgos de los Djudios sovre la baza de estas akuzasyones. Malgrado todo esto, los Katolikos de Damasko kontinuaron a kontar a los turistas, durante munchos anyos, sovre el “santo” ke aviya sido torturado i asasinado por los Djudios, i komo los Djudios fueron salvados de fuersa por las intrigas de Djudios del etranjero. Este kavzo de Damasko tambyen esperto la konsiyensa Djudia sovre la nesesidad de la kooperasyon interkomunitariya, lo ke finalmente sirvyo a la kreasyon de la Alliance Israélite Universelle.
