Los Evenimyentos de esta semana

Silvyo OVADYA Judeo-Espanyol
29 Ocak 2025 Çarşamba

Es diya de Myerkoles ke era el korte de siete de muestro Gran Rabino, İsak Haleva. Fue dospues de la Tefila de la demanyana ke se realizo en el Kal de Neve Şalom i a las dyes el Korte. Buen karar de dirijentes de muestra Komunidad; su famiya; sus amigos i miembros de muestra komunidad estavan prontos para esta seremoniya. Su ijo, el Rav Naftali Haleva izo de muevo un diskorso sovre su padre. Ke su alma repoze en Gan Eden.

   Oy en diya el Rav Yeuda Adoni es el Kaymakam Hahambaşı i es el ke va sinyar todos los dokumentos asta ke va aver eleksyones o un trokamyento ofisial.

   Ay unos kuantos mezes ke la posta no fonksyona para Israel; i es la mizma koza de Israel para la Turkiya. Mizmo las kompanyias de transporto de dokumentos komo el DHL, UPS, Fedex, TNT no estan transportando dokumentos ni paketos entre estos dos payizes. Reelmente una desgrasia. I syertos lektores tenian ordenes para merkar livros del Sitio Sefaradi. Myerkoles un amigo se estava indo a Israel para ver a su ija i su inyeto i le demandi si puediya postar de Israel estos paketos. Apareji todo i se los di. I el diya sigiente embiyi un mail a estas personas ke merkaron livros dizyendo ke los postimos de Israel. Ay serka de kuatro o sinko anyos ke vendemos livros. I ay solo 4 o sinko deyos ke tornaron atras. Unos kuantos fueron dados kuando vijitaron la Turkiya. Ma si el e-mail o el numero de telefono no son djustos no es posivle de kontaktarlos. Los ke tyenen problemes mos pueden kontaktar por el e-mail: [email protected] o kon whatsapp al numero +90542 4258176 . Si reushimos a azer parvenir todos estos livros reelmente va estar muy kontente. En unas kuantas semanas vos va dar la lista de los livros ke tornaron atras i ke no pudimos kontaktarlos.

   Ayer diya de Shabat era un otro diya yeno de emosion para los Israelyanos, mizmo para los Palestinianos i mizmo para los Djudios de la Diaspora. Kuatro Israelyanas ke lavoravan en la frontiera Palestiniana para observar kada punto de la frontiera i ke fueron rehen, tornaron a sus kazas dospues de 18 mezes. No vemos una situasion terivle en la television, ma kreo ke esto no reflekta la verdad. Uvo syertos problemes entre los Israelyanos i los Militanes del Hamas porke trokaron una de las rehenes. Dyeron syertas eksplikasiones, ma dingunos pueden dar eksplikasiones a las famiyas ke estavan asperando sus ija dospues de 18 mezes. Esperamos ke esto va kontinuar. I todos los rehenes van a tornar a sus kazas.  Esperamos ke van a tornar sanos.

   Ay mas de un mez ke el Muzeo Djudio esta ekspozando las Ketubas Otomanas i Turkas en el Muzeo Djudio. I reelmente muncha djente estan viniendo al muzeo solo para ver esta Ekspozision. Esto reelmente muy orozo. Komo so el kurator de esta ekspozision es reelmente un orgolyo para mi de ver tanta djente enteresada. Ma grande pena es ke muestro Gran Rabino, Rav İsak Haleva ke fue uno de los ayudantes para esta eksposision, no topo el koraje para vinir i vijitar esta ekspozision. La djente i los dirijantes del Muzeo keren ke la ekspozision kontinue un syerto tyempo mas. Dospues, esta ekspozision va ir a İzmir durante dos semanas. Si no la vijitatesh, ayde al Muzeo Djudio…

Siz de yorumunuzu yapın

Tüm Yorumları Görün