Kontinuare a kontarvos las salatas ke komimos en las sivdades ande kaminimos en el mundo. La salata Panzanella es una spesyalidad de Italya. Esta salata salyo en la rejyon de Toskana. Los agrikultores izyeron esta salata en Toskana i de aki se konosyo en Italya i tambiyen despues en el mundo entero. Dizen ke el nombre de Panzanella viene del chini de supa i pan. Algunos yaman esta salata salata de pan mojada. Komo en el mundo entero, los kazalinos Italyanos aziyan el pan en kaza. Kuando se aziya el pan bayat, no lo echavan al chop ma kon este pan bayat aparejavan una salata. A esta salata diziyan pan mojada o salata Panzanella. Kuando estavamos en Milano, dishimos mos iremos kon treno a Como. En kaminando aya oras de midi mos ambreyimos; dishimos komeremos una salata kon un bira al lado; pasaremos ansina el medyo diya de komer. Le demandimos al garson ke salata pudemos komer. Tenesh una salata spesyal? Mos disho, vos trayere la salata Panzanella. Es una salata spesyal de Toskana. Mos trusho a la meza la salata ke estava komo un Djimbush de kolores. Kon una birika yelada komimos la salata. Me plazyo tanto ke le demandi komo se aze esta salata i me konto un poko la konsejika de Panzanella i komo se apareja.
Los materyales ke se meten aryento de la salata son:
2 revanadas de pan bayat kortadas chikos. En Toskana azen kon pan sin sal komo Foccacia.
10 domates cherry
3 pimyentones kada uno una kolor, vedre, kolorado, amariyo.
7-8 topizikos de kezo Mozarella
1 sevoya kolorada chika partida en largo
2-3 ojas de Basiliko
2 ojas freskas de rigani
Para la sos:
2 kucharas de supa de azete de oliva
1 kuchara de supa de vinagre balzamika
½ kuchara de chay de sal
Los panes se friyen aryento de un sarten sin azete
En una otra sarten las tomates i los pimyentones o las pipirushkas se sofriyen un poko.
Aryento de un bol se apareja la sos
Despues se meten todos los materyales en un chini ondo. En fin se echa ensima los panizikos ke se friyeron i la sos.
Me esto akodrando todos los amigos kon ken estavamos endjuntos komyendo esta salata en Italya kuando estavamos en Como mos enamorimos de la savor.