El arvole de la vida es un simbolo komun en munchas relijiones i mitolojias. Simboliza el reino divino o espiritual i mos amostra ke los misterios de la vida estan entrelazados kon el kozmetiko. Es un siklo de la vida i de la muerte.
El arvole de vida se diviza en varias partes: las raizes reprezentan el nasimiento i muestra aliansia kon la tierra, el trono se asosia kon el kresimiento personal, las valores ke mos akompanyan en el resto de la vida i las ramas i las ojas son los kaminos ke pasamos en muestras vidas i las desiziones ke tomamos.
En la relijion judia, el arvole de vida reprezenta la union del ombre kon el Dio. Para munchos, el arvole reprezenta el kresimiento, la estabilidad i la fertilidad para konektarse kon las jenerasiones futuras.
En la Kabala, este arvole de vida es el simbolo de la struktura del universo i el kamino de la alma para alkansar a una illuminasion spiritual. Tiene dos lados. El lado maskulino ke es el derecho simboliza la saviduria, la buendad, la beyeza, la eternidad i el lado feminino ke es la siedra simboliza el fundamiento, la severidad i la realizasion.
El arvole de Noel es una adaptasion del arvole de la vida. El orijin se remonta a la epoka de los antiguos romanos par selebrar el pasaje a los dias largos, a la luz. Dekoravan las ramas de los arvoles i realizavan ofertas a los Diozes. En mizmo tiempo, en la mitolojia nordika, este arvole se utilizava para selebrar el nasimiento del dio del Sol i la fertilidad. En el siglo VIII, en Alemanya, San Bonifacio korto un arvole del universo, un pino, i lo dekoro kon mansanas para reprezentar el pekado de Adam i Eva i kon kandelas para simbolizar la luz ke simboliza el nasimiento de Kristo ke trae al mundo una luz de mueva esperansa.
Kon tiempo estas mansanas se transformaron en bolas briyantes, las kandelas en luz i se formo el arvole de Noel moderno.
Muestra Hanuka, es tanbien una bienvenida fiesta de la luz ke mos aklaro en el momento el maz oskuro de muestro puevlo. Esta luz mos ambezo a tener esperansa en el futuro i en la paz mundial.
Este anyo Judios i Kristianos selebraron las fiestas en mizmo tiempo. Esperamos ke esta union trayga una enerjia pozitiva i paz al mundo.
“La vida es un arvole de miles de ramas. Depende de tu aksyon, de tu entuziasmo ke ramas vas a elijir para topar tu kamino. Algunas te yevan direktamente al mijor fruto i otras a la oja seka al punto de kayer. El jardiniero sos tu.”
