Diya de alhad estavamos endjuntos kon el Sinyor Aydemir Ay de Edirne ke se okupa de los echos del turizmo en la Munisipalidad de Edirne. Es el ke eskrivio kon su amigo Yılmaz Seçim el livro sovre las Komidas Djudias de Edirne. Este livro fue publikado en turko, en inglez i en Judeo-Espanyol. Es dospues ke la Itahdut lo treslado en ebreo. Por la primera edision, no tenemos mas livros en inglez ni en Judeo-Espanyol. I vamos a publikar por la segunda vez en inglez i en djudezmo. Va ser un plazer para mi de ver ke un livro se esta publikando una segunda vez. En turko en poko tyempo fuimos ovligados de publikar una segunda edision. I los estamos vendyendo en el Muzeo Djudio, en el Şalom i en el Sitio Internet del Sentro Sefaradi. Antes de esta segunda edision vamos a adjustar unas kuantas reseftas muevas.
El treser livro ke devemos de publikar es el livro de las komidas de la kozina Sefaradi de Izmir en Inglez. Estamos avlando kon las dammas ke eskrivyeron i realizaron este livro.
En poko tyempo vamos a realizar la publikasion de estos tres livros.
Avlando de los reportajes ke se realizaron, kero avlar syertas kozas kon vozotros, muestros estimados lektores. Me demandaron kualo se puede azer para konservar las kostumbres de los Djudios de Trakya; de Edirne, de Kırklareli i de Tekirdağ. Reelmente munchos Djudios bivyeron en estas sivdades. Ya savemos ke mas de 6.000 almas estavan bivyendo en estas 3 sivdades en el 1929. I dospues de los evenimyentos de Trakya (1934) i dospues de la taksa sovre la fortuna (1942), la populasion se amenguo a 1.100 personas en el 1955. Ke desgrasia. Devemos de saver ke los Djudios son una komunidad muy sensivle. Si los tokan, topan otro remedyo para bivir mas liberos. Reelmente devemos de pensar sovre las kostumbres de los Djudios de estas tres sivdades. Oy en diya la mas grande partida de los Djudios orijinarios de estas sivdades biven en Israel, en los Estados Unidos, i en Estanbol. No se si estan kontentes i orozos en los payizes i en las sivdades ke biven, ma komo tuvyeron problemes bastante seryozos en sus sivdades de orijin, no tenemos nada de dizir.
Mizmo si abandonaron estas sivdades, devemos de azer esforsos para konservar las kostumbres de los orijinarios de estas sivdades; kon sus komidas, kon sus muzikas i kon sus kostumbres. Devemos de realizar reportajes kon esta djente para determinar sus djenero de vida.
