En los diyas de la independensya de la Medina, una ijika de 10 anyos dezeyava azerse Balerina, su madre se estava merikiyando de este pensado i projeto, le diziya syempre, “Deke keres penar a alevantar la pacha, yay otras ermozas kozas en el mundo”. Ma kuando Rina Schenfeld vido el filmo Los Kalsados Korolados, eya insistyo mas ke siempre en su desizyon. Kuando fue soldada en la armada a los 18 anyos, Rina fue la Balerina de grande valor. A los 26 anyos, se kontava una Balerina kon experiensa, aziendo parte del famozo grupo Bat Sheva. A los 29 anyos, Rina tomo el titro de prima Balerina profesyonal.
Kontinuaremos a kontar la vida de Rina ke a 44 anyos formo su propyo grupo de Bale en un teatro ke tomo su nombre. Oy a la edad de 85-86 anyos es la prima balerina de su teatro, grupo ke tomo el nombre “Sahaki Sahaki” ke vyene de la kantika konosida de Shaul Tshrenikovski, una kantika ke avla de esperansa, en el bruido de las sirenes de la gerra. Las kreasiones de Rina dan en tyempo de gerra, en lo ke esta en el studyo, azyendo repetisyon un sentimyento de glorya, de libertad, de solevantar el korason i azer sintir mas ke syempre su identidad Judiya. Kuando los bruidos de los kanones se azen sintir, muestra kreyensa de una fin mueva kale ke puje… Portanto frente a la trajediya de kada diya, kale ke mos de fuersa, de no abokar la kavesa delantre del apreto de estos diyas de perikolo. Kada diya Rina troka sus figuras de bale sigun las sirkonstansias, de esperansa de tristeza. Rina kamina syempre kon la dicha konosida, "Krearemos Arte para no murir, arte, muzika, bale, mas ke en los diyas de pas”. El arte es una manera de luchar, a esperar, en diyas de espanto i dezespero. Esta grande Balerina aedada mos dize i repeta en estos diyas, tenemos de menester del arte ke enfortese muestra kreensiya de diyas mijor, el arte ke mos enfortese, mos kalma, mos da pasensya i koraje.
Rina kontinua a baylar i krear kada diya figuras muevas, la mueva kreasyon de Rina es inspirada de la kantika “Yo Kreyo”, ke la kantava su padre en su chikes, i sus byervos “Sahaki Sahaki” dan esperansa. Rina tanbien eskrivyo kantikas dizyendo ke una balerina tanbien kale ke aga oyir su boz.
Oy en diya Rina kontinua a baylar, no es muy fasil para eya, kale muncho esfuerso i koraje. Ay muy pokas balerinas de su edad en el mundo entero, i los saltos en shena, demanda koraje i enerjiya. Rina mos akodra siempre ke el puerpo es un kante… Si se kere es una manera de relevar el moral en toda okazyon.
