Mi madre diziya: “El Dyo ya save lo ke aze”. Digamos mi mama kuando avlava, syempre u kon una dicha u kon un proverbo. Para kada sujeto de ande ya topava lo ke uydeyava no se. De sorte i yo tengo un buen vokabular de dichas i proverbos.
Por siguro todos ya savesh ke ay buen karar de tyempo ke no ay aktividades en muestra komunidad. La razon muy klara ma de mi en parte dos djugos de teatro estan asperando en mi eskritoryo, no me se fue la mano a meterlos al kashon, kon esperansa ke los vamos a djugar un diya. Agora vash a dizir los teatros son emportantes u la gerra. Siguro ke dezeamos ke se eskape una ora mas antes este galut i ke no se mueran almas ma la verda dizere ya me eskarinyi de la shena, de las provas i lo mas muncho de mis keridos amigos de la shena.
Syempre me plaze ke ayga aktividades, de sorte ke el Dyo ya save lo ke aze, me las manda fin al pye.
Mi kerido amigo investigador, İzzet Bana, esta aparejando un arshivo maraviyozo del teatro djudyo en Turkiya. Topo tekstos, fotos, filmos de antes anyos i panyos. Kuando vino la sira al Dostluk me sono la puerta, porke ya save ke yo no echo abasho ni un papeliko. Unas kuantas vezes mos topimos i le ayudi; le di tekstos i fotos ke i yo mezmo ya me aviya olvidado ke djugi en akel teatro. Le di un arshivo de kaji 40 anyos, por siguro le sirvyo muy muncho.
En konversando me disho si kero vinir, ke tyene una envitasyon de 2 personas para “Premios de Teatro Sadri Alışık” (Sadri Alışık tiyatro ve sinema ödül gecesi). De vista le dishe ya vengo.
El 4 de Julio a la ora 20.30 me fui al sentro MKM. Mustafa Kemal Merkezi. I pasi una nochada byen diferente. Por empesar pasimos por el tapet kolorado, konosi un alay de artistas i artistos de teatro ke admiro. Mos travimos fotografias kon eyos i entrimos al salon. Avlantes maraviyozos, luzes, filmos de sus vidas, i de sus aktividades. Dospues los eskojidos resivyeron sus plaketas. Kada uno i uno avlo de su vida, remersyo a los aktores i al juri ke los eskojyo.
La nochada se termino kon un kokteyl byen riko i de muevo kon fotos de famozos aktores. Torni a kaza antuzyazmada i oroza de asistir a esta manera una nochada gloryoza. Te remersyo İzzet i te oguro otro tanto de ti.
