EL DIA DE LAS MADRES

            El dia de la Madre es una fyesta ke se selebra en la onor de las madres en la grande partida del mundo i en diferentes datas del anyo. Esto depende del paiz, de la kultura i de la nasyon.

Este dia se fyesta el sigundo alhad del mez de mayo en

la Turkiya. Esta data es una okazyon spesyal ke se selebra, para ekspresar la gratitud a las madres. Este dia, markado por rekonosimyento, ofre la shans de refleksyonar sovre el amor inkondisyonal ke tenemos por las madres.

Deke se selebra el Dia de las Madres? Es una selebrasyon, ke tyene komo objektivo de dar la emportansa menesteroza a las madres, porke  su influensa pozitiva enriva de sus ijos i su famiya es importante. Tambyen es una shans para refleksyonar sovre la transmisyon de valores ke ensenyan las madres, i las tradisyones familyares. En este dia mos akodramos de muestras madres, ke biven, u ke estan en el paradiso (z.l.) ke son muy presyozas i valutozas por todo modo de kozas ke azen.

            Este dia se selebra en diferentes datas aldoredor del mundo, responde a una varyeta de faktores istorikas, kulturales i relijyozas, propyos de kada paiz. En munchos paizes, la eleksyon de la data tyene un orijin relijyozo.

El amor de una madre, es el impulso ke le permete a un umano ayegar a lo imposible. Para munchas personas, el dia de las Madres selebra relasyones espesyales, enfortese las relasyones familyales i evoka rekuerdos karinyozos.

•  Las madres dan apoyo a sus famiyas.
• Las madres son la luz ke illuminan el kamino de vida de sus keridos.
• La madre es la persona la mas emportante ke egziste en la vida. Es el mijor regalo de la vida.
• La madre es una luz en la eskuridad. Es la protektora de sus ijos.
• El amor i la pasensya infinita de la madre son un trezoro.
• Es la persona la mas valutoza, fuerte i luchadora.
• Eya es la fuente de savidurya i la konsejera para todos.
• Es la persona ke syempre esta aryento de muestros korasones, i de muestros pensamyentos.
• Kerida madre mia, mizmo ke no estas mas aki, tu amor i tu ensenyamyento me akompanyan syempre.
• Syempre me akodro de ti kon amor i gratitud, por ser la mijor madre ke puede egzistir en el mundo.
• Grasyas por los momentos inolvidavles ke bivimos endjuntos.
• Mizmo ke no estas allado de mi i no puedo abrasarte, syempre syento el abraso kayente de tu amor en mi korason.
• Grasyas ke fuites para mi, el egzempyo de fortaleza, amor i perseverensya.
• Grasyas por ser mi konsejera, mi konfidente, mi mijor amiga, la persona en ken syempre puedo konfiarme, fuites mi luz, en la eskuridad i mi esperansa en los tyempos difiisiles.
• Grasyas ke fuites la personifikasyon del amor verdadero. Syempre tu famiya era en primero de todo, i te sakrifiates por muestro byenestar. Eras una mujer invinsible.
• Syempre vas a ser la persona la mas espesyal en mi vida.
• Tu amor i tu prezensya syempre seran una fuente de fuersa i de komodita.

Kada dia penso en ti, estas syempre en mi korason.

Ke tu alma repoze en gan-eden, kon mi kerensya, mi muy kerida mama.