Un grupo de estudiantes judios de la Universidad de Columbia eskrivieron una letra, kontratakando las protestas anti-israelis i antisemites. Yamaron esta letra "En Muestro Nombre". En la letra poderoza, eskrivieron deklarasiones sovre el judaizmo. Fin agora, 500 estudiantes metieron sus signaturas debasho la letra. De dia en dia, mas munchos estudiantes estan adjustando sus nombres. Los estudiantes estan asperando ke esta letra va enspirar los judios de otras eskolas i van a eskrivir deklarasiones similares.
Aki vos esto eskriviendo el rezumen de la letra:
Estamos eskriviendo komo estudiantes judios glorifikandomos kon muestra kultura i istoria. Mos estamos sintiendo a vuestro lado en klasa. Somos kompanyeros de laboratorio, kompanyeros de estudio, i amigos. Estamos partisipando en los mizmos klubes, organizasiones de voluntarios i ekipos sportivos. Muestro buto es pasar los egzamenes finales komo vozotros. Ma malorozamente mos ovligatesh a defender publikamente muestras identidades judias.
Muestros tekstos relijiozos son yenos de referensias a Israel i Yerushalayim. Mezmo ke jenerasiones bivieron en el egzilo i en la diaspora, el puevlo judio nunka deshó de iluzionarse de tornar a muestra patria. Todos serramos muestro seder de Pesah kon la proklamasion: “El anyo el vinyen en Yerushalayim!”. Munchos de mozotros no somos praktikantes relijiozos, ma mantenemos muestras identidades judias. Mos ekspulzaron de Rusia, Libia, Etiopia, Yemen, Afganistan, Polonia, Ejipto, Arjelia, Alemanya, Iran i la lista kontinua. Israel es el solo lugar ande los judios pueden tomar posesion de sus propios destinos de manera segura.
En los ultimos sesh mezes, los estudiantes de Columbia empleyaron sloganes komo “no keremos judios aki”, “muerte a Israel” i “torna atras a Polonya”. Estan empleyando el nombre judio komo sinonimo de rasista, opresivo o jenosido. Ya savemos muy bueno ke el antisemitizmo esta trokando de forma. Estamos orgulyozos de Israel. Israel, la sola demokrasia del Oriente Medio, es el ogar de milones de judios mizrahis, ashkenazis, etiopes, miliones de arabos israelis, miliones de muzulmanes i miles de kristianos i durzis. Israel es un milagro por el puevlo judio. Todos keremos un futuro mijor para los israelianos i los palestinianos. No kijimos kreermos kuando vimos los estudiantes i los profesores blokando los estudiantes judios para ke no puedan entrar en las partes del kampus ke todos partajamos kada dia. Una koza es sigura, nunka mos vamos a olvidar esto. No desharemos de defendermos. Estamos orgulyozos de ser judios i estamos orgulyozos de muestra patria. Vinimos a Columbia porke keremos ekspandir muestro meyoyo. Muestra tradision mos dize: "Ama la paz i bushka la paz". Esperamos ke la paz, la verdad i la empatia va ganar a la fin. Endjuntos vamos a pueder reparar muestro kampus.
