La primera edisyon del festival de EUROVISION se
selebro en la sivdad Lugano ke se topa en la Suisa el
24 mayo 1956. Syete payizes partisiparon akel tyempo, prezentando dos kansyones kada uno.
Esto es un konkurso de la televizyon ke se aze kada anyo,
ande partisipan los reprezantantes de las televizyones.
La Eurovision es el program de televizyon el mas
vyejo ke se transmetyo en el mundo entero.
Este program fue konosido komo el Eurovision Grand Prix.
El nombre de Grand Prix fue adoptado por los payizes
Frankofones, por la Danimarka i Norvejia komo:
Le Grand Prix Eurovision de la Chanson Européenne.
El buto de esta organizasyon era unir a los puevlos en la muzika i dar a konoser al mundo la muzika evropea.
Esto es la razon ke permete a Israel i a la Australia, kantar en el festival evropeo i esto esta en el propyo reglamento del
Festival. Tendremos en kuento ke este konkurso no es un festival organizado por la Union Evropea, si no por la UER,
ke es una korporasyon ke depende de radios difusoras
publikas de diferentes payizes.
Israel esta integrado en la UER komo miembro
Aktivo, entonses tyene derecho de partisipar aki.
Israel fue ganador kuatro vezes desde su primera aparisyon a la Eurovision en 1973. Partisipo en 40 okazyones en el festival,
ay 50 anyos. Gano kon la kantika en el anyo 1978, Aba ni bi.
En el anyo 1979 ganaron, en Yerushalayim kon la kantika
Halleluyah. La tresera viktorya fue en 1998 kuando Dana International reprezento al payiz kon la kantika Diva, provokando los djudyos ortodoxes, i tuvo un grande eko medyatiko sovre el sektor mas liberal de Israel en favor de la liberta i los derechos de omoseksuales, lesbienes i transeksuales.
Vente anyos despues, la kantante Netta gano en
Lisbon el festival de la kansyon de Eurovision 2018, kon
el tema Toy.
Algunas de las estreyas las mas konosidas del payiz son:
Ofra Haza i Noa.
Israel, kon Espanya, Luxembourg, Irlanda i Suisa son los unikos payizes ke ganaron unas kuantas vezes en este Festival. En 20 okazyones Israel reusho a estar aryento del TOP-10 del Final.
Eurovision no kere opozarse a Israel por este konkurso, ma munchos payizes ke estan al lado de la Palestina, se estan
preparando para azer un boykot. Los payizes nordikos estan kontra la partisipasyon de Israel.
Izlanda, Finlandia tyenen motivos politikos kon Israel.
Estos payizes estan al lado de la Palestina.
La Eurovision tyene un karakter apolitiko, es un evento
apolitiko, ande los kantadores son emportantes i no los governos. Por esta kavza Israel va partisipar a este festival.
Es el konkurso muzikal el mas emportante del mundo.
La kantika de Israel es: Hurricane, una kantika muy
melodika, ke empesa en un tono repozado, ma kontinua
kon un tono i ritmo animado. La ke va kantar se yama Eden Golan.
Estamos rogando ke Israel gane en este konkurso kon una grande reushita.
