Ay syete mezes ke los miembros de muestra komunidad no tyenen la posibilidad de estar endjuntos en kada lugar. Solo unos kuantos kales (Şişli, Ortaköy, Caddebostan i syertos diyas Yeniköy i Kemer) estavan avyertos i los yahides pudyeron partisipar a las orasiones en estas keilas. Kon la fiesta de Pesah los miembros de la administrasion dyeron karar de avrir las sinagogas. I los diyas de fiesta mas de sheshentas personas partisiparon a las orasiones. Vemos ke kada vez tenemos syertos problemes de seguridad, dospues tenemos una populasion emportante ke frekuentan las keilas.
Kada anyo komemoramos los sesh miliones de Djudios ke fueron matados durante la segunda Gerra Mondial. Este anyo esta komemorasion fue realizada en el Neve Şalom. Todos los miembros del Bet-Din i syertos hazanes estavan prezentes en esta selebradsion. Siertos Konsules Generales komo el de Alemanya; el de Austria; el de Polonya, todos en raporto kon el terreno ande fue el Holokosto estavan prezentes tambien en la Sinagoga. Los lideres relijiozos de los Kristianos estavan en esta selebrasion.
Dospues de la minha ke fue meldado por dos ijikos, el Gran Rabino Haleva i syertos raves meldaron syertas orasyones. I dospues los elevos de muestra eskola en primero dyeron un diskorso i dospues 10 o 12 entre eyos reprezentaron syertas personalidades del Getto de Varsova. I todos kontaron lo ke izo esta personalidad. Avlando de estas personalidades, kontaron el eroizmo de syertas personas ke bivyeron en el Getto. Ay anyos ke partisipo a estas komemorasiones. Ma kada vez esto yeno de emosion. En entrando al Neve Şalom, mos dyeron shadayes ande estava eskrito syertos birvos en turko, en ebreo o en inglez. I a la fin de la seremomnia estos magen davides fueron plasados en una pared ke se topava delantre del Ehal.
Tornando a kaza avri imediatamente la television para ver lo ke afito entre Israel i el Hamas. Nada. Malorozamente la pas no fue achetada. Ay syete mezes ke mas de 130 Israelyanos estan prizonaryos en las manos de los militanes del Hamas. No savemos kuantos entre eyos estan sanos. Mismo si estan sanos en kuala situasion se topan? Reelmente pekado. Mizmo si dan 50 prisonarios Palestinianos por un prisonario israelyano. Dinguna emportansa. Lo mas emportante es ke una pas se realize entre Israel i los militanes del Hamas.
Espero ke kon la pas ke se va realizar vamos a tener una libertad mas ancha en las asosiasiones de muestra komunidad. Por darvos un egzemplo un diya di karar de lavorar en el Şalom para la koreksion de un livro. Kale dar haber a un alay de personas para pueder lavorar dos oras kon solo tres personas!
