El partido del prezidente “Erdogan” sufrio un dezastro en las eleksyones munisipales de Turkiya. Por la primera vez desde su fondasyon en 2001 peryo las eleksyones. La opozisyon del puevlo, anonsya el trionfo istoriko i Erdogan admetyo ke no reusho al rezultado dezeado.
El prezidente de la munisipalidad de Estambol i kandidato del partido Popular Republikano (CHP), “Ekrem İMAMOĞLU”, izo una avla en Estambol a los sivdadinos. Estambol, es la sivdad la mas grande de la Evropa i el motor ekonomiko de Turkiya. Ekrem İmamoğlu gano el 50.92% de los votos, enfrente del kandidato del governo de Erdogan “Murat Kurum” ke gano el 40.05% de los votos. Erdogan keriya rekuperar el kontrol de Estambol i ke los rezultados de estas eleksyones puediyan ranforsar su kontrol en el panorama politiko ke estava divizado.
En Ankara “Mansur YAVAŞ”, gano kon un grande avantaj de 20% sovre su rival del partido governante AKP. Ankara, la kapitala del paiz era el sigundo objektivo santral, del aktual prezidente, ke keriya ganar ma no reusho.
Erdogan en su avla disho al puevlo: El puevlo mos dyo un mesaje muy klaro.
“Eyos keren tornar atras al Estado de derecho, keren un paiz de todas las kolores, donde las diferensyas son la rikeza de un paiz”. El rezultado de estas eleksyones es istoriko, i el mesaje es ke lucharemos para salvar la demokrasiya i el estado de derecho en muestro paiz.
Erdogan aze 30 anyos ke empeso su karyera politika. Estambol es la sivdad la mas emportante para los turkos porke el ke kontrola la sivdad, kontrola el paiz.
“Las eleksyones se kompletaron demokratikamente” disho el prezidente del paiz, el puevlo mos dyo un mesaje emportante kon sus votos. Para muestro partido este rezultado no es una piedrita, no es un final”.
Los sivdadinos turkos votaron para trokar la fotografiya politika de todo el paiz. El rezultado de estas eleksyones es muy emportante, el mesaje es ke kale luchar para salvar la Demokrasiya i el Estado de Derecho en muestro paiz.
El prezidente de Turkiya anonsyo en el 10.03.2024 ke la eleksyon munisipal de este mez sera la ultima ke se selebrara kon el, en frente de su paiz ke dirijo ay 20 anyos.
Erdoğan estava muy siguro de ganar el kontrol de las tres sivdades: Estambol, Ankara i İzmir.
El rezultado ke mos shasheyo es el dezeo de los elektores ke votaron para dar una leson al partido del governo, a kavza de la profondidad de las difikuldades ekonomikas. La enflasyon alta desho a munchas famiyas ambyertas, a kavza de no pueder merkar los produktos de baza, ke son kezo, karne, guevos, frutas, legumes etc…
La partisipasyon a las eleksyones fue 76%. Entonses 594.000 miembros del personal de seguridad, estavan dispuestos en todo el paiz para garantizar ke el voto se termine sin problem.
