Ya vino Pesah. De ke era chiko fin agora me plaze el mued de Pesah. Lo mas de Pesah ke me agrada es las komidas. Siguro ke es muy diferente un mued de Pesah; el seder ke azemos, las komidas, las dulsuryas las kantikas ke kantamos despues de komer komo El Kavretiko ets. Yo vos kero kontar mas muncho las komidas i las dulsuryas ke aparejava mi madre, ke este en ganeden. Emprimero empesava de merkar las kozas mensterozas. Me akodro merkavamos guevos del bazar de Feriköy kon kasha. En primero kon 100 deyoz empesavamos. Despues empesavamos a merkar prasa, ispinaka, bizelya i kalavasa. La karne i el pishkado trayiya mi padre, ke este en ganeden, de Şişhane ande aviya el kasap Nisim Liçis i el balukçi Avram. Antes no aviya dip frizes komo oy; no puediyan aparejar de un mez antes. Se aziya de unas kuantos diya antes de Pesah. Las mujeres aziyan las kyoftes de prasa i el prasifuchi en primero, porke aparejar i gizar las kyoftes de prasa no era muy fasil. Despues aziyan las minas de ispinaka i de kalavasa. En ada kaza se aziya kekes a lo manko 2 o 3 deyos. Kada mujer no puediya azer el aharotsi, demandavan un poko para meter a la meza de la vizina ke era mas bedjerekliya. Por esto mi madre aziya un poko muncho ke ya saviya ke le ivan a demandar: Sofi hanum me pudes dar del aharotsi yo no esto puedyendo aparejar la resefta komo azes tu. I mi madre le dava a ken keriya. Unos kuantos diyas no saliyan del mupak porke el aparejamyento era muy pezgado i difisil. Derken ya viniya la noche de Pesah. Me namorava de azer el seder kon los paryentes, las tiyas, los tiyos, kon los ijos endjuntos era una koza de ver. Kuando se eskapava de meldar la agada kon las palavras YOHELUUUUU, era koza de ver komo viniyan las komidas a la meza. En primero las frituryas i los guevos haminados. Komiyamos los bunmuelos kon asukar de pudra ensima. Despues viniya a la meza el pishkado Levrek kon la sos a la shaka. A mi oy en diya me plaze este pishkado komer kon un rituel komo vos va kontar. En primero empeso romper las matsas al chini; ensima de esto meto buen karar de la sos i en fin un pedaso ermozo del pishkado. I empeso a komer este plato sin tomar suluk. Despues del pishkado vienen las komidas i las salatas. En dizyendo salata no vos pareska ke se aparejava solo la salata vedre tambiyen la salata ke se yama Choban i salata de patatas kon sevoya freska i ensima metiyan la sos de mayonez ke se aparejava en kaza. Antes de las komidas majores viniyan unas kuantas komidas para empesar komo Endjinara o ravikos. A todos no les plaze el kodrero ma a mi me gusta muncho. Al lado kon 2 kucharas de bizelya i patatas ke se kozyo en el orno i 2 kyoftes de prasa. Mas de esto viniya en vezez turlu o rulikos de berendjena, mi esfuegra ke este en ganeden aziya novyas de berendjena, mos komiyamos los dedos. Tambien viniya a la meza Gaina. En vezes Pure o Kroketas de patatas. Despues de este karar de komer komiyamos tishpisti, la spesialita de los Edirnelis i al lado kon salata de fruta. Por esto kada Pesah tomo unos kuantos kilos.
