Ya vino Purim. Kada mued tiene otra savor. Lo mas emportante es las komidas i las dulsuryas ke se aparejan. Oy vos kero kontar en mi chikes el Purim komo se aparejava en la kaza muestra. No era muy pezgado komo Pesah o si no komo Rosh Ashana. Mas de las komidas era emportante las dulsuryas. A mi padre ke este en ganeden, le plaziya bever raki. I en Purim porke es de uzansa de bever vino o otros beverajes, en la kaza muestra se beviya mas muncho raki o whisky. Por esto mi madre ke este en ganeden, gizava muy savrozas komidas, en Purim aparejava kozikas mezelikes. El tarama ke se aparejava en kaza no tomavamoz del mezedji pronto, tambiyen la salad Rus. Kozas saladas de pishkado kada vez se topava en la kaza muestra. Komo Garato, Gupas. Del balukchi Avram ke teniya la botika en la kaye del Neve Shalom tomava mi padre Likorinos i chiroz. Ansi se aparejava la meza kon los mezelikes. Mas de esto le gustava a mi padre Salata de meoyo o si no meoyo frito. Enfrente del kal Apolon aviya el mezedji Mösyö Yomtov; de aya tomava pasturma i un poko de sudjuk. Mi madre aziya el plaki kon aryento karota i patatas i siguro el ajo ke goliya maraviyozo kuando viniya a la meza. Empesavamos a komer kon keyf i bevyendo dos vazikos de raki al lado. Ma yo teniya el tino en los dulses ke ivamos a komer despues de la komida. Aziyamos buen sohbet en la meza. De aki de aya unas kuantas konsejas de Purim, pasava el tiempo muy ermozo. Kuando eskapava de bever el raki mi padre esperavamos i mi madre ke aga el enshaguado de la noche i ke trayga los dulses. En Purim mos aziya Tel Kadayif i Borekitas de muez. Mi padre trayiya el kaymak, ensima de estas dulsuryas metiyamos el kaymak i era una lokura de komer. A la demanyana ke era el diya de Purim, en el dezayuno komiyamos Brumelos i Gyozlemes ensima kon asukar (Pudra). Mi madre me embiyava a Shishane para tomar los brumelos ke vendiya Mösyö Aruh el Kukladji, i los komiyamos kayente kayente kon chay. Era el Rituel de Purim en la kaza muestra.
