Albert Anah
Buenos diyas i alegres keridos.
Kon los anyos, la teknolojia se adelanto tanto ke esta difisil de alkansar a
el ritmo. No se si es solo yo ke me konsiento ansi, o ke mizmo otra djente se
keshan, de las mizmas simptomas.
Echi tino a siertas kozas. Ansi ke me parese ke empesaron a uzar, materyal i
mezuras diferentes en las eskaleras. Pujo la kantidad de los eskalones, i los
izyeron mas altos.
Al tyempo suviya los eskalones a dos a dos. Oy esta difisil de suvir anke uno a uno.
I la eskriturya, si echatesh tino, la izyeron mas chika i estan uzando muncho
mas poka tinta, no se por ke ma; para pueder meldar, devemos de apegar el livro
a la nariz.
Antiyer, para pueder ver los shifros, de la moneda chika ke teniya en la
aldikera tuve menester de salir al sol.
Merki una gazeta, enposivle de pueder meldar, la largor de los brasos no me
abasto... Aprovi rogar a uno ke se asento al lado miyo, ke me ayude en
meldando. Ma ande la jenerasion nueva, esta avlando kon una boz tan basha ke
sintirlos esta enposivle.
Esto provando de arrivar al merkado al kual so auzado; ma ande? El kamino lo
izyeron mas largo de lo ke era. I la stasion del otobus la alesharon de
kaza; no abasto esto todo, adjustaron i una suvida para arrivar.
Las vistimientas si dizes; las estrechearon, no esto kavyendo ariento. I los
kordones de los kalsados, los akurtaron. Enposible de tenerlos para atar.
No estan echando tino, a la vanda ke azen la ventana; avyendo la ventana, esta
aziendo un koryente muy fuerte. Al pareser ke no estan echando tino; ke el
invierno se izo muncho mas yelado de lo ke era.
En pasadas, tuvimos un renkontro kon amigos de la eskola. A dyo; el lugar
esta yeno de kreaturas. Ma ay ke dizir ke las kreaturas de oy estan muncho mas
respektuozos. Uno de eyos me ayudo a abashar del otobus. Me disho; "tiyo,
keres ke te akompanye asta el lugar ke pensas a arrivar?"
Arrivi al lugar del renkontro. Ke veyo?! Mis amigos estan muncho mas
aedados de mi! Pasimos al bar, tomi una birika. Mi amigo, ke mos asentavamos
lado kon lado en la eskola me miro en la kara i me demando; "Mi mujer me guadro las kalsas, saveras ande estan?”. me apareji a darle repuesta, entonses vino la segunda demanda; "ken sos tu?"...
Orijin de Philippe Noiret.
Saludozos todos
(A kontunear.)
