Lo ke vos va kontar es un poko de los rekuerdos ke mos kedo komo de debasho de las nuves i un poko de istorya.
Emanuel Karaso teniya munchas kriyaturas. Una de estas era İda. Muy ermoza ija. Kuando vino la ora, la kazaron kon uno de Tiano, kon ken tuvieron un ijo i una ija. Este kazamiento no sureyo muncho, se kitaron. No se kuanto tiempo despues, se kazo İda kon Ferdinando Karlman. Ferdinando teniya un ermano ke se yamava Poldi.
Asigun meldi en los arshivos, ke no ay munchos, Ferdinand Karlman izo fraguar un Pasaj. Su ermano era su braso derecho. La una puerta teniya por la parte de Tepebashi i la otra era en Pera. Un pasaj yeno de botikas. Botikas muy alavadas. Todo lo ke se vendiya era de prima kalidad. Tanbien aviya shastres, brodaderas, remayözas de kalsas, ke mas no egzisten agora, se vendiya ropas, samaras i munchas otras kozas.
Este pasaj en la parte de Tepebashi teniya dos puertas. En primero se entrava de una puerta grande ke se serrava de suyo, despues de 5-6 pasos aviya otruna puerta ke teniya dos partes. Kuando se entrava de aya, las puertas se meneyavan por atras i por delantre, esto me viniya muy enteresante. Ansina no entrava friyo aryentro del pasaj. Entre estas dos puertas, lo mas se asentavan los sedakeros o los proves poveretos, para no yelarsen en akel friyo de antes, i en mizmo tiempo ganavan dos groshes.
Yo era muy chika para akodrarme mas detalyos. La ermana de mi mama estava para kazar. Komo teniyan 10 anyos de diferensya las dos ermanas, i sus madre se aviya murido muy manseva, mi mama era komo su madre. El ashugar entero de mi tiya se puede dizir ke se izo de aya. Me akodro de las kombinezones i pijamas de saten briyantes, kon broderis ensima, de kolores a kolores. Los manteles ke se desinavan ande el desinator Saporta, se yevavan aya para ke las broden. Eran unas ropas de lino maraviyozas. Despues se merko de aya una yaka de vizon para el palto del ashugar. Tanbien me akodro ke aviya una botika de sutyenes i korses ke las aziyan “sur commande”. Aya aviya una mujer muy godra. Eya tomava las mezuras. Teniya mustachos i me espantava de verla.
Kreyo ke muestro amigo Mois Gabay ke es investigador i eskrivano, teneriya munchos mas detalyos emportantes ma malorozamente no los topi, o no supe toparlos. Ke pekado ke no ay dinguna foto de este famozo Ferdinando Karlman i su famiya.
