EL DIA DE LAS MUJERES

       El 8 del marso se fyesta el “DIA ENTERNASYONAL de la MUJER”.

En este dia se komemora la lucha de la mujer, por su partisipasyon en la sosyedad i esto es rekonosido por las “Nasyones Unidas”.Los derechos de las mujeres son fondamentales para el progreso mondial en los puntos de vista de la pas i de la seguridad.

           La nesesidad de komemorar un dia enternasyonal de la mujer nase al final del siglo XIX. El 8 marso de 1857, las mujeres ke lavoravan en la endustriya de textil, organizaron una grev. Eyas se pelearon para ke los salaryos seyan mas djustos i sufizientes. Las orijines de este dia datan de 1910, kuando un grupo de mujeres de 17 paizes se reunyeron en Danimarka kon dos motivos: Enforteser el adelantamyento en la igualidad i la defensa de los derechos de las mujeres.

Dyes aktividades ke las mujeres realizan mijor ke los ombres.

• Azer munchas kozas en el mizmo tyempo.
• Las mujeres son mijores lideres. Eyas tyenen una mijor kapachitad resolutiva.
• Las mujeres son mas organizadas ke los ombres.
• Tyenen una vida mas larga ke los ombres a kavza de los hormones.
• Se alimentan mijor, eyas komen mijor ke los ombres, malgrado ke el shokola es una muy grande partida de sus dietas.
• La konservasyon fizika es mijor, a kavza de la jenetika.
• Utilizan la moneda mas atentivamente ke los ombres.
• Terminan lo ke empesan, komo por egzempyo los estudyos universitaryos.
• Pueden avlar de sus sentimyentos sin problema.
• Se visten mijor ke los ombres, porke las mujeres tyenen un entereso por la moda, i un mijor guste.

12 Aktividades ke todas las mujeres azen kon grande plazer en sus tyempos libres.

• Ir al sinema, al teatro.
• Pintar las unyas de la mano.
• Meldar un livro enteresante.
• Ir a azer jimnastik, i kaminar en el bodre de mar.
• Oyir muzika.
• Azer komidas savrozas.
• Mirar las fotos vyejas.
• Azer empleos.
• Baylar.
• Azer un banyo relaksante.
• Djugar kon el perro en kaza.
• Enkontrarse kon amigas, pasar tyempo kon eyas, avlar, burlar i azer nostaljiya.

          Las mujeres son superyoras a los ombres, porke la natura les emprezento la karakteristika la mas manyifika, la mas grande ke es: Konkriar persona.

           Las mujeres son muy aktivas seya en sus kazas, seya en sus karyeras, saven lo ke keren i arivan a sus butos. Kon sus kalmo i intelijensya, reushen en sus profesyones solas u kon sus ekipas. Influensan kon sus avlas dulses, i konvensen al d’enfrente.

Eyas son madres de sus ijos, mujeres de sus maridos, tyenen munchas ovligasyones i responsabilitas en sus nidos, estan reushendo en munchos espasyos emportantes.

Eyas koryen a todo modo de koza, abastesen, kreyen un montante de echos ke es difisil de pensar mizmo.

Oy, munchas mujeres estan en un nivel igual de los ombres en los espasyos, politikos, ekonomikos, komersyal i volontaryos.

Unos echos ke son emposibles de realizarsen, se pueden solvar kon la intelijensya pratika de las mujeres.

Por egzempyo “Golda Meir” dirijo un paiz muy emportante del mundo. Rezolvo munchos problemes kon su intelijensya, su dinamizmo i su intuisyon, i fue reushida.

Eyas son las kolonas emportantes de sus famiyas, i ke nunka se derroken.

            Entonses kero felisitar todas las mujeres del mundo entero por sus kerensyas, sus intelijensyas, sus kapachitades por amenajar sus famiyas i el dorredor de sus echos profesyonales.

             Ke nunka no mos manken, porke eyas son el ekilibro del mundo.