Lucien Ginzberg es ijo de padre i madre judios rusos ke se fuyeron a Fransia despues de la revolusion bolshevika en el anyo 1917.
La chikeza de Gainsbourg fue enfluensada por la okupasion de Fransia por la Alemanya en la Segunda Gerra Mondial. Gainsbourg fue ovligado de vistir la estreya amariya, ma esta estreya fue su enspirasyon kreativa en los anyos sigientes. Durante la okupasion, Gainsburg se fue kon su famiya de París asta Limoges, viyajando kon dokumentos falsos. Limoges era la zona libre debasho la administrasion del governo de Vichy, i era un refujio danjerozo para los judios. Despues de la gerra, Gainsbourg ensenyo muzika en una eskola afuera de París, en Mesnil-Le-Roi. La eskola estava debasho la administrasion de los rabinos lokales. Los elevos de la eskola eran los guerfanos de las viktimas del Olokosto. Aki, Gainsbourg oyo munchas kozas de lo ke afito a los judios deportados. Anyos despues, Gainsbourg empleyo los kuentos tristes de las viktimas en su lavoro. Kuando teniya trenta anyos, Gainsbourg era un pintor talentuozo, ma kaliya ke lavore komo pianisto en los bares para ganar su vida.
Mas despues, Gainsbourg fue un kantador, kompozitor, pianisto, direktor de sinema, poeta, pintor, eskritor, aktor i direktor fransez. Por anyos, el fue konsiderado komo una de las figuras las mas emportantes de la muzika popular franseza. En su profesion de muzika, Gainsburg empleyo jeneros komo jazz, mambo, mundo, chanson, pop i ye-ye, rock and roll, rock progresivo, reggae, elektronika, disco, new wave i funk. Gainsbourg fue uno de los muzikos populares ke enfluenso munchos muzikos en el mundo entero.
Serge Gainsbourg, todo tiempo, tuvo una grande amistad por Israel.
En el anyo 1967, Gainsbourg kompozo una kantika kuando el Atashe Kultural de la Embasada de Israel de Fransia, le rogo de kompozar una marsh.
El teksto iva ser eskrito en fransez i iva ser traduizido al ebreo. Ma, kuando la Gerra de Sesh Diyas eklato, las otoridades israelienas tuvieron mas emportantes kozas de azer, i la bobina de la kantika estuvo guadrada en los archives de la radio Kol Israel durante trenta i sinko anyos, asta ke Jean-Gabriel Nouvel, ke saviya la egzistesia de la kantika, la kito en medio. Esta marsh fue una repuesta a todas las atakas antisemitas.
La Arena de Israel
Si, yo va defender la arena de Israel,
Tambien, la tierra de Israel i los ijos de Israel.
Deshame murir por la arena de Israel,
Por la tierra de Israel i los ijos de Israel;
Yo va defenderla kontra kualsiker enemigo,
Arena i tierra, ke me prometieron.
Yo va defender la arena de Israel,
Las sivdades de Israel i la tierra de Israel;
Deshame murir por la arena de Israel,
Las sivdades de Israel i la tierra de Israel;
Todos los Goliates ke vinieron de los piramides,
Se van a retirarsen delantre la Estreya de David.
Yo va defender la arena de Israel,
La tierra de Israel i las kreaturas de Israel,
Deshame murir por la arena de Israel,
La tierra de Israel i las kreaturas de Israel…
