En el mez de febrero peryimos munchas almas, seya en la komunidad djudiya seya en en el mundo del arte. Por empesar peryimos a MARİO LEVİ, un eskrivano i investigator muy presyozo ke tuve la onor de sintir en munchas konferensyas i meldar sus livros maraviyozos.
Por siguro ke todas las muertes mos aze pena ma kuando los konoses un poko mas. Kaji en mezmo tyempo oyimos la muerte de una artista muy presyoza i mezmo kon eya tengo konversado en la Büyükada en el bodre de la mar. “AYLA ALGAN”
Ayla nasyo en el anyo 1937, era ija unika de padre komersyante i madre pintora. Su famiya vinyeron de Creta a Estanbol.
Ayla empeso a djugar el piano a la edad de sinko anyos. Kompleto su eskola segundarya en Notre Dame de Sion. Dospues se fue a Fransya i kompleto sus estudyos en Versailles High Scool. Entremyentes se rankontro kon Beklan Algan ke i el era artisto i se kazaron. Pasaron a los Estados Unidos i aya estudyo teatro.
Ayla Algan teniya una boz de kantar muy empresyonante. En 1971 la yamaron a “Olimpia”, aya tuvo un sukseso inkreible.
Tomo el titolo de “primera artista Turka en Olimpia”. Bivyo syete anyos en Fransya.
Kon el ayudo del Ministro de Turizmo de Turkiya, preparo un album para komerorar el grande poeta YUNUS EMRE.
Tomo grado en el Golden Orfe de Bulgarya kon su kantika kontra la gerra.
Fue konsiderada por el "Premio de Onor de UNICEF"...
Kanto para los Indyos en el festival de Polonya Sopot i gano el titolo mondial, djugo teatros en Berlin.
Ayla Algan era una de las estreyas de teatro mas emportantes del mundo, djugo el rolo de HAMLET, fue la sola artista ke djugo rolo de ombre. Por este rolo tomo el titolo, “MALE HAMLET”.
Artista de teatro, aktora de sinema i televizyon, una de las kantantes ekstraordinaryas.
En una entrevista le demandaron:
“Deke no akseptates el rolo de FUNNY GIRL” ke lo djugo Barbara Straisand?
La respuesta de la artista fue:
“Colombia Pictures keriya firmar un kontrato de 8 anyos para Funny Girl. I mezmo para todos los rolos de Colombia Pictures. Si firmava puediyan azerme djugar en otros rolos mezmo en porno. Por esto no firmi”. “Nunka no djugo rolos negros por paras”.
Ayla ALGAN peryo la vida de una emorajiya selebral a los 87 anyos. Turkiya peryo una grande valor. Ke su alma repoze en ganeden.
Mos vamos a akodrar de esta famoza artista kon sus palavras
“NUNKA NO DJUGO ROLOS NEGROS POR PARAS”.
