En el Şalom de esta semana Elda Sasun izo una entrevista kon Avi ALKAŞ, muy enteresante. I yo, la kije partajarla kon vozotros, keridos lektores para konoserlo de serka.
Avi Alkaş eskrivyo su primer livro intitulado: Los Echos de Empleos i lo publiko. Ken es Avi ALKAŞ:
Avi Alkaş es myembro de la Junta Assesor Europea de la Assosyasyon Internasyonal de Sentros Komersyales (ICSC) i tambyen forma parte del Jurado del premyo europeo de la ICSC. Es myembro tambyen, de la fakulta de la eskola de Desarollo Profesyonal ICSC J. Riordan.
Konosido komo un eksperto en sentros komersyales en Turkiya i internasyonalmente, Avi komparte su vida privada, eksperyensyas komersyales i muevos proyektos kon el lektor por la primera vez en su muevo livro, Shopping Affairs.
Me konsidero komo una persona mazaloza del Dyo, malgrado ke pasi un egzamen muy difisil en la vida. Lo ke dezeyo syempre es ke el Dyo poderozo, no permeta la peryita de un ijo a los paryentes, i syempre ke la muerte seya kon sira. Despues de la peryita de mi ijo Alp Alkaş, ya pude kontinuar a mi vida, i lo ke rogo, lo ke dezeo por los otros es, ke este enkontro seya un egzemplo de vida para otros ke estan preokupados por diferentes motivos i se azen la vida imposible.
No pretendo ser eskritor. Todos me konosen komo uno ke aze Sentros Komersyales. Ya es verdad ke esto marko una grande partida de mi vida, ma yo me kero azer konoser komo un kreator de espasyo.
Komo egzempyo vos puedo dizir ke bivi en mi chikes en Tepebaşı en el apartamento Akasya. Akeyos anyos biviyamos fraternalmente kon personas de diferentes grupos etnikos i relijyozos, kon muestros vizinos en partajando unos kon los otros todo lo ke teniyamos. Alora, kreygo ke kuando todas las personas ke prezervan sus orijinalidades, pueden formar un arvole de kerensya, i la pas va ser superyor a todo modo de koza en el mundo.
Mi echo es de satisfazer las nesessidades de las personas en los espasyos anchos komo los shopping mall'es. Es kada vez muy emportante de reunir las personas en las mezas para komer, bever i englutir endjuntos los bokados ke ay en la meza.
Este livro lo dediki a mi mujer de 44 anyos kon gratitud. Me adresi a mi mujer en dizyendo: el gueso duro de mi vida. Eya parese a una muez dura por afuera, ma tyene un korason de oro. Es por esto ke me adresi a eya de esta manera. En mi livro mensioni a munchas personas ke tuvyeron un grande rolo en mi profesyon. Kero mensyonar tambyen a Viktor Braunstein i Bensiyon Pinto ke me dyeron un apoyo muy grande. Ke sus almas repozen en gan-eden.
Este livro no es solo una otobiyografiya, no es solo la istorya de mi vida, ay munchos momentos importantes.
La primera partida es de kedar de una manera permanente en el momento en los espasyos, bivir el momento en los lugares i no pedrer este momento.
La sigunda partida: los tyempos tyenen una grande importansa en mi vida. Syempre ay periodas de syete anyos en mi vida. Syete es mi numero de shans. Kreygo en la valor numerika del syete. Ay rezultados, i momentos de esto tambyen en muestra vida.
El sentro komersyal es uno de los lugares ande tengo el lavoro.
La ultima parte de mi livro se kreyo kon una metoda de intelijensya artifisyal, ke penso, ke todos deven de uzar.
Ya es djusto ke kon la unyon, kon la kolaborasyon avansamos. Estamos aplikando esto kon mis kolaboradores del lavoro i azemos un buen echo a mi idea.
Kreygo ke las mujeres son muy produktivas. Tengo tres kompaniyas, en las dos tengo mujeres ke estan dirijando todo.
Esto no lo eskrivi en mi livro, ma en la orasyon de Eshet Hayil, la mujer de su kaza reelmente es el refujyo del ombre de kaza. Tengo una gratitud muy grande al Dio.
Este livro me izo akodrar mis razones de kontinuar a bivir, malgrado la grande dolor ke pasi de pedrer a mi ijo.
Esto dezeando kon este livro, de pueder kontribuir asta un syerto punto, de pueder suportar las difikultades ke todos enkontramos en el kamino de la vida.
